ՀԿ-ները կոալիցիաների ստեղծման և այլ միջոցներով փորձում են օժանդակել պետությանը գնումների, էներգաարդյունավետության ոլորտում բարեփոխումների, արևային էներգետիկայի խթանման համար օրենդրության բարելավման հարցերում:

«Կառուցողական երկխոսության հանձնառություն» ենթադրամաշնորհառու էներգետիկ ծրագրերի վերաբերյալ իր տեսակետներն է ներկայացնում «Էներգախնայողության աջակցման հիմնադրամ» ՀԿ կայուն էներգետիկայի ծրագրերի համակարգող Թամարա Բաբայանը:

Հիշեցնենք՝ օգոստոսի 14-ին Իրավաբանների հայկական ասոցիացիայի գրասենյակում «Կառուցողական երկխոսության հանձնառություն» ծրագրի շրջանակներում տեղի ունեցավ կոալիցիաների ստեղծման և որոշ ոլորտային խնդիրների լուծման նպատակով տրամադրված դրամաշնորհառուների հետ հանդիպում:

«Կառուցողական երկխոսության հանձնառություն» ծրագիրն իրականացվում է «Իրավաբանների հայկական ասոցիացիա» ՀԿ-ի (ղեկավար կազմակերպություն), Մարդկային զարգացման միջազգային կենտրոնի, Հայաստանի համայնքների միություն (ՀՀՄ) ԻԱՄ-ի, «Ժողովրդավարական կրթության հայկական կենտրոն-ՍԻՎԻՏԱՍ» ՀԿ-ի, «Փոքր և միջին ձեռնարկատիրության համագործակցության ասոցիացիա» ՀԿ-ի, ինչպես նաև «Ագորա Սենթրալ Յուրըփ» չեխական ՀԿ-ի համատեղ կոնսորցիումով:

Անդրադառնալով ծրագրի նպատակներին՝ Թամարա Բաբայանն ասաց. «Ծրագրի էությունն է ստեղծել ՀԿ-ների կոալիցիա, օժանդակել պետությանը էներգաարդյունավետ գնումների ոլորտում բարեփոխումների հարցում: Մյուս դրույթն արևային էներգետիկայի խթանման համար հատկապես համայնքային մակարդակներում նեթմիթերինգի օրենդրության բարելավմանն ուղղված միջոցառումներն են, որ ևս աշխատանքային խմբի հանդիպման ընթացքում քննարկվել է: Լրացուցիչ քննարկում տեղի կունենա հանրային ծառայությունները կարգավորող հանձնաժողովում:

Նշենք, որ հանդիպմանը հրավիրված էին բոլոր այն կազմակերպությունները, ՀԿ-ները, որոնք  առաջնորդող են իրենց դրամաշնորհների կոալիցիաների համար: Բոլորը ներկայացրին իրենց ծրագրերի շրջանակում մասնակցությունը և գործողությունները: Թամարա Բաբայանը մանրամասնեց. «Հատկանշական է՝ ծրագրեր կային, որ դեռևս կոալիցիաների կազմումն ավարտված չէր: Մեր դեպքում չորս ՀԿ-ներից կազմված կոալիցիան արդեն ձևավորված էր: Հանդիպման ընթացքում նաև որոշակի համագործակցության հնարավորություններ ստեղծվեցին այլ ՀԿ-ների միջև: Այս հանդիպումն այնքանով էր ուշագրավ, որ բացի այն ՀԿ-ները, որ մեր գործունեության համար ընտրել էինք, ևս երկու ՀԿ ցանկություն հայտնեցին մեզ հետ աշխատել, և մենք էլ, բնականաբար, կհամագործակցենք»:

Թամարա Բաբայանն առանձնացրեց մի շարք կարևոր խնդիրներ. «Օրինակ՝ դրանցից մեկը կոալիցիայի փաստաթղթերի կազմումն ու ստորագրումն է չորս ՀԿ-ի հետ, մյուսն աշխատանքային խմբի ստեղծումն է, որի նպատակն է մեր կողմից իրականացված օրենսդրական բարեփոխումներն առաջին իսկ փուլից ներկայացնել շահագրգիռ կողմերին և ունենալ նաև նրանց մասնակցությունն այս գործում, որ մշակվող առաջարկներն ու վերջնական նախագծերն ընդունելի լինեն և հետագա փուլերում  բացառենք հնարավոր սխալները»:

Տիկին Բաբայանը հայտնեց, որ այս պահին ֆիքսվում է մոնիտորինգում ներգրավվող կանանց տվյալների բազան. կա համագործակցություն տարբեր ՀԿ-ների հետ, որոնք աշխատում են կանանց և մարդկային ռեսուրսների հետ կապված ոլորտներում.  «Զուգահեռաբար արդեն պատրաստվել է տեխնիկական առաջադրանքը և մինչև սեպտեմբերի առաջին շաբաթ կունենանք խորհրդատու, որը կսկսի օնլայն  հարթակի մշակման աշխատանքները»:

Կարևոր առաջարկներ են ներկայացվել նաև գնումների առումով: Թամարա Բաբայանն այս առիթով մանրամասնեց. «Արդեն երկու կարևոր առաջարկ ներկայացրել ենք ֆինանսների նախարարություն, որը քննարկվել է մեր աշխատանքային խմբի հանդիպման ընթացքում: Այս պահին դա արդեն հասունացած է, մնացած կիրարկումն ապահովող դրույթները մենք արդեն կմշակենք և կներկայացնենք թե՛ կողմերի համաձայնությանը, թե՛ հետագայում ՀՀ ֆինանսների նախարարությանն օժանդակելու համար»:

Թամարա Բաբայանը հայտնեց նաև, որ Իրավաբանների հայկական ասոցիացիան նշված աշխատանքային քննարկումների ժամանակ պարզաբանել է ծրագրի իրագործման հետ կապված ընթացակարգային հարցեր, ներկայացրել մոնիտորինգի արդյունքներ և հայտնել իր աջակցությունը ծրագրերի  թիմերին հատկապես պետական կառավարման մարմինների հետ համագործակցություն ապահովելու առումով։