Նոյեմբերի 30-ին Վանաձորում ԵՄ Կայուն էներգետիկ շաբաթվա շրջանակներում, անցկացվեց «Կանաչ և կայուն զարգացում» խորագրով ինտելեկտուալ խաղ, որը կազմակերպվել էր «Քաղաքապետերի դաշնագիր՝ Արևելք» ծրագրի շրջանակներում Հայաստանի համայնքների միության կողմից Վանաձորի, Սպիտակի, Ստեփանավանի, Տաշիրի և Ալավերդու համայնքապետարանների հետ համատեղ։

Միջոցառմանը մասնակցում էին Վանաձորի Վ. Տերյանի անվան թիվ 5, Գրիբոյեդովի անվան թիվ 11 ավագ դպրոցների, Սպիտակի Սուրեն Ավետիսյանի անվան ավագ դպրոցի, Լեռնանցքի Մեսրոպ Վարդանյանի անվան միջնակարգ դպրոցի, Ալավերդու Ստ. Շահումյանի անվան թիվ 5 ավագ դպրոցի, Ստեփանավանի Հովհ. Թումանյանի անվան ավագ դպրոցի և Տաշիրի Արտակ Խաչատրյանի անվան ավագ դպրոցների 35 աշակերտներ։

Մասնակից 7 թիմերին խաղի ընթացքում տրվեցին շուրջ 60 հարցեր տարբեր թեմաներով՝ էկոլոգիա, կլիմայի փոփոխություն, ջերմոցային գազեր, շրջակա միջավայր, աշխարհագրություն, վերականգնվող էներգիա և էներգաարդյունավետություն, ֆիզիկա, քիմիա և այլն:

Միջոցառման նպատակն էր ոչ միայն բացահայտել ամենաուժեղ թիմերին, այլև բարձրացնել մասնակիցների իրազեկվածությունը կլիմայի փոփոխության, դրա հետևանքների դեմ պայքարի և կայուն զարգացման հիմնական սկզբունքների վերաբերյալ: Բացի այդ, մասնակիցները կարողացան ձեռք բերել ինտելեկտուալ խաղերի կազմակերպման և մասնակցելու փորձ, որը կկարողանան կիրառել կայուն էներգիայի օրերի շրջանակներում նմանատիպ միջոցառումներ նախաձեռնելու համար։

Վեց փուլերի արդյունքներով մրցանակային տեղերը զբաղեցրել են հետևյալ դպրոցների աշակերտները.

Առաջին տեղ՝ Ալավերդու Ստ. Շահումյանի անվան թիվ 5 ավագ դպրոց՝ Գրիգորյան Մարինա, Ուլիխանյան Անի, Գիգոլյան Նարե, Նալբանդյան Շահանե, Սարգսյան Սոֆի։

Երկրորդ տեղ՝ Տաշիրի Արտակ Խաչատրյանին անվան ավագ դպրոց՝ Պողոսյան Անի, Նարգիզյան Անի, Գրիգորյան Մոնիկա, Ալբերտյան Լուսինե, Չալաբյան Վիկտորյա։

Երրորդ տեղ՝ Ստեփանավանի Հովհ. Թումանյանի անվան ավագ դպրոց՝ Այվազյան Գայ, Անտոնյան Սուսի, Հաջաթյան Նոնա, Սարգսյան Վիկա, Սարուխանյան Ռուզաննա։

Հաղթողները ստացան սպորտային պարագաներ և գրքեր գնելու նվեր քարտեր, ինչպես նաև պատվոգրեր։ Նվերներ են տրվել նաև բոլոր մասնակիցներին, ովքեր մրցանակ չեն ստացել։

Հայաստանի համայնքների միություն