Հայաստանի համայնքների միության տնօրեն Արմեն Հարությունյանը հանդիպել է Հայաստանի վերականգնվող էներգետիկայի և էներգախնայողության հիմնադրամի տնօրեն Կարեն Ասատրյանի հետ։

Հանդիպման ընթացքում քննարկվել են համայնքներում վերականգնվող էներգետիկայի զարգացման, էներգաարդյունավետության բարձրացման և էներգախնայողության ծրագրերի իրականացմանն ուղղված համագործակցության հնարավորությունները։

Կողմերը կարևորել են համայնքների ներգրավվածությունը կայուն էներգետիկ լուծումների ներդրման գործընթացում՝ ընդգծելով էներգաարդյունավետության բարձրացման, վերականգնվող էներգիայի աղբյուրների կիրառման և համայնքների կարողությունների զարգացման նշանակությունը։

Հանդիպման ընթացքում պայմանավորվածություն է ձեռք բերվել շարունակել համագործակցությունը և առաջիկայում կազմակերպել հանդիպում համայնքների ղեկավարների մասնակցությամբ, որի ընթացքում կներկայացվեն ՀՎԷԷ հիմնադրամի կողմից իրականացվող և նախատեսվող ծրագրերը, ինչպես նաև համայնքների մասնակցության և ներգրավման հնարավորությունները։

Համագործակցության նպատակն է նպաստել համայնքներում էներգաարդյունավետության բարձրացմանը, վերականգնվող էներգետիկ լուծումների տարածմանը և կայուն զարգացմանն ուղղված նախաձեռնությունների իրականացմանը։