Անցկացվեց hայ-ֆրանսիական ապակենտրոնացված համագործակցության շրջանակներում գործող Հայաստանի համայնքների միության «Ֆրանսիա» խմբի նիստ

Անցկացվեց hայ-ֆրանսիական ապակենտրոնացված համագործակցության շրջանակներում գործող Հայաստանի համայնքների միության «Ֆրանսիա» խմբի նիստ

07.02.2020

Փետրվարի 7-ին Երևանում անցկացվեց hայ-ֆրանսիական ապակենտրոնացված համագործակցության շրջանակներում գործող Հայաստանի համայնքների միության «Ֆրանսիա» խմբի նիստը: Նիստին մասնակցեցին համայնքների, մարզպետարանների, գործընկեր կազմակերպությունների, ՀՀ ԱԳՆ-ի, ՀՀ տարածքային կառավարման և ենթակառուցվածքների նախարարության ներկայացուցիչներ, ՀՀ-ում Ֆրանսիայի դեսպանության ներկայացուցիչներ դեսպան Ժոնաթան Լաքոտի գլխավորությամբ:

 

Հայաստանի համայնքների միության շրջանակներում 2010 թվականից գործում է «Ֆրանսիա» խումբը, որը ձևավորվել էր 2010թ հոկտեմբերին Երևանում անցկացված  հայ-ֆրանսիական ապակենտրոնացված համագործակցության 1-ին համաժողովի հանձնարարականով։ Խմբի անդամներն են շուրջ 30 համագործակցություններ ներկայացնող այն համայնքներն ու մարզերը, որոնք գործընկերային կապեր ունեն ֆրանսիական տեղական իշխանությունների ներկայացուցիչների հետ: Խումբը համաժողովների միջև ընկած ժամանակահատվածում համակարգում է գործնկերների համատեղ գործունեությունը։

2018 թվականի մարտի 20-ի նիստում խմբի ղեկավար է ընտրվել Էջմիածնի քաղաքապետը (ներկայումս՝ գործող քաղաքապետ տիկին Դիանա Գասպարյանը)։

Նա ողջույնի խոսքում նշեց. «Հայ-ֆրանսիական համագործակցությունն ունի պատմական հիմքեր և շատ կարևոր է  մեր երկրի համար: Կցանկանայինք շնորհակալություն հայտնել պարոն դեսպանին այստեղ գտնվելու համար, ինչպես նաև բոլոր համայնքների ղեկավարներին, գործընկերներին: Մենք կցանկանայինք լսել ամեն համայնքում կամ մարզում հայ-ֆրանսիական ապակենտրոնացված համագործակցության մասին հաշվետվություններ, որը հնարավորություն կտա մեզ ավելի սերտ ճանաչել միմյանց և ավելի արդյունավետ կդարձնի նաև  աշխատանքը»:

Հայաստանի համայնքների միության նախագահ Էմին Երիցյանը շեշտեց՝ սա մագիստրալային համագործակցություն է, քանի որ մենք ունենք մոտ 30 գործընկերություններ տեղական իշխանությունների և ռեգիոնների միջև. «Հայաստանի անկախությունից հետո ունենք բավականին մեծ որակական փոփոխություն, քանի որ զուտ ֆրանսիական կողմից օժանդակության փոխհարաբերություններից շատ գործընկերություններ արդեն վերածվել են երկկողմ, հավասար գործընկերության: Այս համագործակցությունները եզակի են իրենց քանակով և բովանդակությամբ»:

ՀՀ-ում Ֆրանսիայի դեսպան Ժոնաթան Լաքոտը հայտարարեց՝ ապակենտրոնացված համագործակցությունը ՀՀ և Ֆրանսիայի միջև շատ ավելի մեծ դերակատարություն ունի, քան այլուր. «Այդ հարաբերությունները ձևավորվել են շատ ավելի վաղ, քան մեր երկու երկրների միջև դիվանագիտական հարաբերությունները: 30 տարի անց ևս այդ համագործակցությունը շարունակում է մնալ ՀՀ-ի, սփյուռքի գործողությունների վեկտորը: Հայ-ֆրանսիական ապակենտրոնացված 4-րդ համաժողովը առիթ է, որ թարմացնենք երկու երկրների միջև հարաբերությունները»:

ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը կարևորեց հայ-ֆրանսիական ապակենտրոնացված համագործակցությանը նոր բովանդակություն և ընթացք հաղորդելը ու արձանագրեց. «Այդ համագործակցությունն ամենօրյա է: Իմ գործընկերներից շատերը հենց այսօր ունեն միջոցառումներ, ծրագրեր հայ-ֆրանսիական ապակենտրոնացված համագործակցության շրջանակում իրենց բարեկամ քաղաքների հետ, ինչը վկայում է այն մասին, որ այս համագործակցությունը շատ դեպքերում ոչ թե հռչակագրային է, այլ բովանդակային:

«Ֆրանսիա» խմբի նիստի ընթացքում համայնքների և մարզերի պատասխանատուները ներկայացրին հակիրճ զեկույցներ 2019-2020թթ․ ապակենտրոնացված համագործակցության առանջընթացի և ծրագրերի վերաբերյալ, AIMF-ի և Ֆրանսիայի գյուղական համայնքների ղեկավարների ասոցիացիայի (AMRF) հետ համագործակցությունների մասին տեղեկություններ, 2020 թվականի վերջին Ֆրանսիայի Լիոն քաղաքում կայանալիք հայ-ֆրանսիական ապակենտրոնացված համագործակցության 4-րդ համաժողովին առնչվող նախապատրաստական հարցեր:

Հայ-ֆրանսիական ապակենտրոնացված համագործակցության մասին

 

Հայ-ֆրանսիական ապակենտրոնացված համագործակցությունը երկու երկրների միջև բարեկամության երկար պատմության մասն է կազմում: Այսօր առկա են շուրջ երեք տասնյակ համագործակցություններ։ Ապակենտրոնացված համագործակցությունը ուղղված է տեղական համայնքների զարգացմանը և նպաստում է հայկական և ֆրանսիական տեղական իշխանությունների փորձի փոխանակմանը և համատեղ նշանակություն ունեցող խնդիրների քննարկմանը:

Առաջին Հայ-ֆրանսիական ապակենտրոնացված համագործակցության Համաժողովը կայացավ Երևանում 2010 թ. հոկտեմբերին: Այն համախմբեց գրեթե 30 համայնքներ ներկայացնող 250 մասնակցի, որոնք կենտրոնացան չորս թեմաների շուրջ. տեղական կառավարում և կադրերի պատրաստում, տնտեսական զարգացում, զբոսաշրջություն և գյուղական զարգացում, ֆրանսերենի ուսուցանում, ինչպես նաև համագործակցությունների փոխադարձ բաշխում: Համաժողոի ընթացքում Ֆրանսիայի Միավորված Քաղաքների կողմից ստեղծվեց «Հայաստան» խումբ, որի նպատակն է աջակցել հայ և ֆրանսիական տեղական իշխանությունների համագործակցությանը: Հայաստանի համայնքների միության շրջանակներում կազմավորվեց «ֆրանսիա» Խումբը՝ նույն նպատակով։

2013 թվականի հոկտեմբերին Վալանսում տեղի ունեցած երկրորդ համաժողովը եզրափակվեց մասնակից ֆրանսիական և հայկական տեղական համայնքների պատվիրակների կողմից Վալանսի հռչակագրի ընդունմամբ, որը սահմանեց համագործակցության ոլորտային նպատակներ և առաջարկություններ՝ վերահաստատելով հետագա համագործակցության կարևորությունը:

Հայ-ֆրանսիական ապակենտրոնացված համագործակցության երրորդ համաժողովը անցկացվել է 2016թ. դեկտեմբերի 1-ից 2-ը Երևանում: Հայաստանի համայնքների միության և Ֆրանսիայի միավորված քաղաքներ ասոցիացիայի համագործակցությամբ կազմակերպված այս միջոցառումը համախմբել էր ավելի քան 200 մասնակիցների: Համաժողովի ավարտին, 2016 թվականի դեկտեմբերի 2-ին ընդունված եզրափակիչ Երևանի հռչակագիրը սահմանում է հաջորդ երեք տարվա անելիքները՝ որպես գերակայություն ընդունելով տարածքների տնտեսական զարգացումը:


ՆՈՐՈՒԹՅՈՒՆՆԵՐ

Հրազդանցի երիտասարդները փնտրում են համայնքային խնդիրների լուծման ուղիներ. կարողությունների զարգացման դասընթաց
Հրազդանցի երիտասարդները փնտրում են համայնքային խնդիրների լուծման ուղիներ. կարողությունների զարգացման դասընթաց

14:49

24 02 2020

Փետրվարի 23-ին Կոտայքի մարզի Հրազդան քաղաքի տասնյակ երիտասարդներ մասնակցեցին ՏԻՄ-երում...

ՏԻՄ-երում երիտասարդների ներգրավվածությանն ուղղված դասընթաց՝ Աբովյան քաղաքում
ՏԻՄ-երում երիտասարդների ներգրավվածությանն ուղղված դասընթաց՝ Աբովյան քաղաքում

13:07

24 02 2020

«Ազատ քաղաքացի» քաղաքացիական նախաձեռնությունների աջակցման կենտրոնը Հայաստանի...

Տեղական տնտեսական զարգացման ֆորում՝ Թբիլիսիում. Վրաստանի տարածքային զարգացման նախարարի տեղակալը կարևորեց միջսահմանային համագործակցությունը
Տեղական տնտեսական զարգացման ֆորում՝ Թբիլիսիում. Վրաստանի տարածքային զարգացման նախարարի տեղակալը կարևորեց միջսահմանային համագործակցությունը

13:12

20 02 2020

Թբիլիսիում փետրվարի 20-ին անցկացվում է Տեղական տնտեսական զարգացման ֆորումը: Ֆորումին մասնակցում...

Հայաստանում տեղական ինքնակառավարման և ապակենտրոնացման վիճակի վերաբերյալ զեկույց
Հայաստանում տեղական ինքնակառավարման և ապակենտրոնացման վիճակի վերաբերյալ զեկույց

13:58

18 02 2020

Հայաստանում տեղական ինքնակառավարման և ապակենտրոնացման վիճակի վերաբերյալ զեկույց