Փետրվարի 3-ին Փարիզում անցկացվում է Եվրոպայի խորհրդի Տեղական և տարածքային իշխանությունների կոնգրեսի (ԵԽ Կոնգրես) Բյուրոյի նիստը:

Նիստի ընթացքում Բյուրոյի անդամները կուսումնասիրեն Եվրոպայում տեղական և տարածաշրջանային ժողովրդավարության իրավիճակը, մասնավորապես Ուկրաինայում ու Բոսնիա և Հերցեգովինայում: Բյուրոյի անդամները կքննարկեն նաև Ստրասբուրգում կայանալիք ԵԽ Կոնգրեսի 38-րդ նստաշրջանի օրակարգի նախագիծը: Նշենք, որ ԵԽ Կոնգրեսի գարնանային նստաշրջանը կանցկացվի մարտի 17-19-ը Ստրասբուրգում: Նստաշրջանը կանցկացվի «Տեղական և տարածքային իշխանությունները՝ առանցքային դերակատարներ կայուն զարգացման նպատակների իրականացման հարցում» խորագրով:

Այնուհետև Բյուրոյի անդամները կուսումնասիրեն Կոնգրեսի գլխավոր քարտուղարի հաջորդ ընտրության թեկնածությունները: Կոնգրեսի գլխավոր քարտուղարի ընտրությունը տեղի կունենա գարնանային նստաշրջանի ընթացքում՝ մարտի 17-ին:

Բյուրոյի նիստի ընթացքում կքննարկվեն նաև Կոնգրեսի առաջնահերթությունները 2021-2025 թթ. ժամանակահատվածի համար: Կներկայացվեն առաջարկներ «Տեղական ժողովրդավարության եվրոպական շաբաթվա գործընկեր» խորագրով մրցանակաբաշխության հետ կապված: