:

    Սպիտակի բնակիչները գումար են խնայում ջեռուցման վճարների հարցում. վերականգնվող էներգիայի արդյունավետ օգտագործման ծրագրի արդյունքները

    17 August, 2018

    Սպիտակի բնակիչները գումար են խնայում ջեռուցման վճարների հարցում. վերականգնվող էներգիայի արդյունավետ օգտագործման ծրագրի արդյունքները

    2014-ին Սպիտակ քաղաքը միացել է Եվրոպական միության «Քաղաքապետերի դաշնագիր» նախաձեռնությանը, որը կոչված է համընդհանուր կամավորական պատասխանատվությամբ միավորելու տեղական ինքնակառավարման մարմիններին և տարածաշրջանային իշխանություններին՝ հօգուտ «կանաչ էներգիայի արտադրման»-ի և կյանքի որակի բարելավման:

    Նախաձեռնությանը միանալով՝ Սպիտակում արդեն մի քանի տարի է իրականացվում է «Վերականգնվող էներգիայի արդյունավետ օգտագործման հնարավորությունը Սպիտակ քաղաքում» ծրագիրը, որի շրջանակներում Սպիտակի 27 բազմաբնակարան շենքերում էներգիայի խնայողության համար փոխվել և ջերմամեկուսացվել են տանիքները, դռները, պատուհանները, տեղադրվել են արևային ջրատաքացուցիչներ և մարտկոցներ: Արդյունքում ապահովվել է 15-30% էներգախնայողություն: Սպիտակի քաղաքապետ Գագիկ Սահակյանը մեզ հետ զրույցում վստահեցրեց՝ ծրագիրն արդիական է, այս պահի դրությամբ անհրաժեշտություն:

    Խոսելով արդյունքների մասին՝ Գագիկ Սահակյանն ասաց. «Մենք առաջին մեր ծրագիրը որ իրականացրինք, հենց համայնքապետարանի շենքի և նախադպրոցական ուսումնական հաստատության շենքի ջեռուցման համակարգի նորացումն ու արդիականացումը, ջերմամեկուսացումն էր, որի արդյունքում  ներգրավեցինք վարկային միջոցներ: Հիմա մենք անխափան կարողանում ենք վարկը փակել, մեկ միլիոնի չափով էլ տնտեսում ենք ունենում, պատուհանները, առաստաղները ջերմամեկուսացրինք, նոր կոնդենսիոն կաթսաներ դրեցինք, իհարկե, ներդրումը մեծ էր՝ մոտ 30.000 դոլարի չափ, բայց հեշտությամբ լուծեցինք»:

    Գագիկ Սահակյանը վստահեցրեց՝ ծրագրի իրականացման և էներգախնայողության շնորհիվ բնակիչներն այս ձմռանը մոտ հիսուն տոկոսի խնայողություն են արել ջեռուցման վճարների հարցում:

    Քաղաքապետի տեղեկացմամբ՝ նախատեսված է Սպիտակում  կառուցել հիսուն վոլտանոց արևային էլեկտրակայան, որի նախագիծն արդեն արված է, և աշխատանքներն ընթանում են: