Օգոստոսի 18-ին Վարդենիսի համայնքապետարանում տեղի ունեցավ «Քաղաքապետերի դաշնագիր՝ Արևելք» ծրագրի կողմից «ԵՄ Կայուն էներգիայի շաբաթ-2025»-ի շրջանակներում համայնքում անցկացված «Արդար և մրցունակ կանաչ անցման խթանում» խորագրով նկարչական մրցույթի մասնակիցների պարգևատրման արարողություն։

«Քաղաքապետերի դաշնագիր՝ Արևելք» ծրագրի Հայաստանի ազգային փորձագետ Արտեմ Խարազյանը ներկայացրեց Դաշնագիրը Հայաստանում՝ վստահեցնելով՝ ոչ միայն Հայաստանում, այլև Եվրոպայի տարածքում մեծ կարևորություն է տրվում «ԵՄ Կայուն էներգիայի շաբաթվան», ինչը նպաստում է հանրության իրազեկվածության բարձրացմանը։

Պարգևատրման արարողության ժամանակ մրցանակակիրներին հյուրընկալեց համայնքի ղեկավար Ահարոն Խաչատրյանը։ Ողջունելով նրանց վստահեցրեց՝ մյուս տարի համայնքի մասնակցությունն ավելի ակտիվ է լինելու «ԵՄ կայուն էներգիայի շաբաթվա» միջոցառումներին։

Վարդենիսն այս տարի առաջին անգամ է միացել «ԵՄ Կայուն էներգիայի շաբաթ-2025»-ին։ Շաբաթվա ընթացքում համայնքում իրականացվել է 7 միջոցառում, որոնց մասնակցել է մոտ 800 մարդ։ Կազմակերպվել է նկարչական մրցույթ, բնապահպանական դաս՝ մանկապարտեզներում, տեղեկատվական հանդիպում, թեմատիկ անիմացիաների դիտում, կայուն էներգիայի և թափոնների կառավարման վերաբերյալ տեղեկատվական հանդիպում, սպորտլանդիա, բնապահպանական միջոցառում՝ բակի մաքրում, մարզական միջոցառում։

Վարդենիսի համայնքապետարանում կազմակերպված միջոցառման ընթացքում պարգևատրվեցին Աիդա Խաչատրյանը, Աննա Բադալյանը, Նեկտար Մուրադյանը, Մարի Խչեյանը, Զոյա Ղազարյանը և Շուշանիկ Սահակյանը՝ նկարչական մրցույթին մասնակցության համար։ Նշենք նաև, որ նկարչական մրցույթի հաղթողները ավելի վաղ պարգևատրվել են Վարդենիսի համայնքապետարանի կողմից։