Հուլիսի 23-ին Գավառ քաղաքում Գավառի ինկուբատորի 10 մասնակիցների համար անցկացվեցին սեմինար-դասախոսություններ:

Սեմինար-դասախոսություններն իրականացվեցին Եվրոպական միության կողմից ֆինանսավորվող «Կառուցողական երկխոսության հանձնառություն» ծրագրի շրջանակներում: Ծրագիրն իրականացվում է կոնսորցիումի կողմից, որի կազմում են «Իրավաբանների հայկական ասոցիացիա» ՀԿ-ն (ղեկավար կազմակերպություն), «Մարդկային զարգացման միջազգային կենտրոն» ՀԿ-ն, «ՓՄՁ համագործակցության ասոցիացիա» ՀԿ-ն, Հայաստանի համայնքների միությունը, Ժողովրդավարական կրթության հայկական կենտրոն-ՍԻՎԻՏԱՍ» ՀԿ-ն և չեխական «Ագորա Սենթրլ Յուրոփ» ՀԿ-ն:

Այդ շրջանակներում «Կառուցողական երկխոսության հանձնառություն» ծրագրի համակարգող, Հայաստանի համայնքների միության նախագահ Էմին Երիցյանը դասախոսություն կարդաց սահմանադրական և ՏԻՄ բարեփոխումների վերաբերյալ, նաև անդրադարձ կատարվեց այն հարցերին, թե նոր օրենսդրական փոփոխություններով ինչ դեր կարող են ստանձնել ՔՀԿ-ները ՏԻՄ-երի հետ փոխհարաբարություններում:

Ծրագրի փորձագետ Վահրամ Վարդանյանն էլ սեմինարի մասնակիցներին խորհրդատվություն տվեց ծրագրային ճիշտ առաջարկ գրելու, մշակելու վերաբերյալ:

Սեմինար դասախոսությունները կլինեն շարունակական, հաջորդը կանցկացվի Կապանում, որի ընթացքում կքննարկվեն նաև տեղական կայուն զարգացման նախաձեռնություններում ավելի լայն մասնակցության մեխանիզմները, տեղական իշխանություններին աջակցելու միջոցները, համայնքների կողմից տեղական իշխանության գործունեության վերահսկման մեթոդները  և այլն: