Արդեն ավանդական դարձած ԵՄ Կայուն էներգիայի շաբաթն (EU Sustainable Energy Week) այս տարի անցկացվում է հունիսի 20-ից մինչև 22-ը՝ «Մաքուր էներգիային անցման արագացում՝ ծախսերի նվազեցման և հմտությունների զարգացման նպատակով» խորագրի ներքո:
Սևան համայնքում Կայուն էներգիայի շաբաթվա շրջանակներում անցկացվեց հերթական միջոցառումը, այս անգամ` Սևանի թիվ 2 «Զարթոնք» մսուր-մանկապարտեզում:

Դաստիարակչուհի Ռուզան Աղաջանյանի` ավագ խմբի սաներին միավորել էր բնության պահպանության խնդիրը` էներգախնայողության, մաքուր էներգիա ստանալու բաղադրիչներով:
Ինտերակտիվ պարապմունք-վիկտորինան հագեցած էր դիդակտիկ պարագաներով, ուղեկցվում էր տեսանյութերով:
Տեսանյութերի հեղինակներն ու մասնակիիցները երեխաներն էին, որոնք իրենց վարքագծով, մոտեցումներով քարոզում էին բնության նկատմամբ հոգատարություն, սեր, բնության պահպանությանն ուղղված կոնկրետ գործողությունների մշակում:
Փոքրիկներն իրենց պարապմունքի վերջում կարողացան անցում կատարել դեպի մաքուր բնություն, որտեղ ամեն ինչ ներդաշնակ է, հարմարավետ ու անվտանգ: Հիշեցնենք, որ Սևան համայնքն արդեն 3-րդ տարին է, ինչ միանում է Կայուն էներգիայի շաբաթվան` ԵՀ «Քաղաքապետերի դաշնագիր՝ Արևելք» ծրագրի ներքո: