Մարտունի համայնքում «Քաղաքապետերի դաշնագիր՝ Արևելք» ծրագրի և Հայաստանի համայնքների միության կողմից պարգևատրվել են ԵՄ Կայուն էներգիայի շաբաթվա շրջանակներում համայնքում անցկացված մրցույթների հաղթողները։

Մարտունու համայնքապետարանում կազմակերպված մրցանակաբաշխության ժամանակ մրցանակակիրներին ողջունել են Մարտունի համայնքի ղեկավարի տեղակալ Արմեն Շահինյանը և «Քաղաքապետերի դաշնագիր՝ Արևելք» ծրագրի ազգային փորձագետ Արտեմ Խարազյանը։ Նա  ներկայացրել է ծրագրի գործունեության ուղղություններն ու նպատակները։

Արդեն ավանդական դարձած ԵՄ Կայուն էներգիայի շաբաթն (EU Sustainable Energy Week) այս տարի անցկացվեց հունիսի 11-ից 13-ը՝ «Նվազագույն արտանետումներով էներգետիկ լուծումներ մրցունակ Հայաստանի համար» խորագրով:

Մարտունի համայնքում Կայուն էներգիայի շաբաթվա շրջանակներում կազմակերպվել են լուսանկարչական, նկարչական մրցույթներ, հեծանվավազք, սեմինար, ցուցահանդես։

Մարտունու համայնքապետարանում տեղի ունեցած մրցանակաբաշխության ժամանակ պարգևատրվել են «Նվազագույն արտանետումներով էներգետիկ լուծումներ մրցունակ Հայաստանի համար» խորագրով նկարչական մրցույթի հաղթողները՝ Մարիա Ներսիսյանը (12 տ.), Անի Պողոսյանը (13 տ.), Անգելինա Ժամխարյանը (12 տ.), Թագուհի Ավետիսյանը (15 տ.), Թագուհի Գրիգորյանը (14 տ.), Վահե Մկրտչյանը (14 տ.), Սերոբ Սիմոնյանը (11 տ.), Նարե Մնացականյանը (11 տ.), Անահիտ Բաղդասարյանը (14 տ.)։