«Համայնքներն արտակարգ դրության ժամանակ» խորագրի ներքո ներկայացնում ենք, թե կորոնավիրուսի կանխարգելման համար ինչ աշխատանքներ են կատարվում Արարատի մարզի Նորամարգ համայնքում:

Ներկայացնում ենք հարցազրույց համայնքի ղեկավար Արման Թադևոսյանի հետ:

-Արտակարգ դրության այս օրերին համայնքն ինչպե՞ս է ապրում: Բնակիչներն ինչո՞վ են զբաղվում:

-Համայնքում սովորական իրավիճակ է: Ուղղակի բնակիչների շարժը մի քիչ ավելի պասիվ է, քանի որ մարդիկ մտածում են՝ տնից դուրս չգան:

-Համայնքապետարանի կողմից ի՞նչ կանխարգելիչ միջոցառումներ են իրականացվում համայնքում:

-Այսօր քլոր ենք բերել, քլորամաքրման աշխատանքներ ենք իրականացնում խանութներում, կանգառներում, տրանսպորտում, մարդաշատ վայրերում: Նաև դիմակներ ենք կարում, բաժանում ժողովրդին: Մինչև այսօր համատարած բոլորին բաժանում իէնք, այսօրվանից ի վեր կտանք ծերերին, անապահով ընտանիքներին, հիվանդներին, սակայն եթե ցանկացողներ լինեն, բոլորին էլ կտրամադրենք:

-Դիմակ կարելու նախաձեռնությունը որտեղի՞ց ծնվեց:

-Նախաձեռնությունը տեսա ֆեյսբուքով. Էջմիածնում մի տղա էր կարում: Զանգեցինք, հանդիպեցինք, ձևը և նյութի տեղն ասաց, գնեցինք, բերեցինք, սկսեցինք կարել: Հետո արդեն նախաձեռնությանը միացան համայնքի այն բնակիչները, որոնք կարի մեքենա ունեին: Արդեն կան երեք-չորս հոգի, որ կարում են:

-Համայնքապետարա՞նն ինչ գրաֆիկով է աշխատում այս օրերին:

-Այնպես չէ, որ արտակարգ իրավիճակում գրաֆիկ ենք փոխել: Նույնատիպ աշխատում ենք, ուղղակի ախտահանվում է տարածքը, մենք աշխատում ենք դիմակներով, ձեռնոցներով: Այնպիսի արտառոց բան չկա, որ ասեմ համայնքապետարանում փոփոխություն ենք արել: Ուղղակի համայնքապետարանի դուռն ենք փակ պահում. մեկ պատուհանով ենք ընդունում դիմումները, որ շարժը համայքնապետարան շատ չլինի: Հայփոստն էլ մեր համայնքապետարանի տարածքում է, այնպես ենք անում, որ մարդիկ քիչ մտնեն-դուրս գան:

-Ձեր գնահատմամբ՝ համայնքներ այսօր որքանո՞վ են պատրաստ դիմակայելու կորոնավիրուսը:

-Չենք էլ մտածել նման հիվանդության մասին, որ պատրաստ լինեինք. ամեն ինչ ոնց որ մեկ ակնթարթում եկավ, բայց այնպես էլ չէ, որ պատրաստ չէինք: Պատրաստ պետք է լինենք ամեն ինչի: Միասնություն  որ լինի, ամեն բան էլ իր տեղը կընկնի: ֆեյսբուքում էլ որ մի քիչ քիչ փնովեն մարդկանց, այլ բուն գործով զբաղվեն, շատ լավ կլինի:

-Համայնքն այսօր ի՞նչ օգնության կարիք ունի:

-Կապի մեջ եմ մարզպետարանի հետ, խորհրդակցում ենք միասին, բայց այս պահին ոչնչի կարիք չունենք: Նույնիսկ բանկային փոխանցում կատարեցինք ամբուլատորիային, որպեսզի տեսնենք, թե առաջնահերթ ինչ է պետք անել, որ ավելի սուղ ժամկետում կորոնավիրուսի դեմն առնենք: