Օգոստոսի 31-ին Հայաստանի համայնքների միության նախաձեռնությամբ անցկացվել է աշխատանքային քննարկում՝ նվիրված Հայաստանի համայնքների միության ռազմավարության ու ինստիտուցիոնալ փոփոխություններին։

Քննարկմանը մասնակցել են Միության ռազմավարության և ինստիտուցիոնալ փոփոխություններին առնչվող հարցերի քննարկման համար ձևավորված աշխատանքային խմբի անդամները, Միության խորհրդի ու վարչության անդամները, համայնքների ներկայացուցիչներ:

Հիշեցնենք՝ Հայաստանի համայնքների միությունը սկսել է Միության 2021-2025 թ.թ. Ռազմավարական պլանի մշակման աշխատանքները՝ հաշվի առնելով, որ լրանում է գործող Ռազմավարական պլանի ժամկետը, ինչպես նաև COVID-19 համավարակով պայմանավորված անորոշություններից խուսափելու և տարեկան աշխատանքային ծրագրերը նախապես պլանավորելու համար:

Հայաստանի համայնքների միության նախագահ Էմին Երիցյանը աշխատանքային խմբի քննարկման ընթացքում համայնքների ներկայացուցիչներին է ներկայացրել Միության կատարած աշխատանքները, առաջիկայում իրականացվելիք ծրագրերը:

Նա նշել է՝ Միության նոր ընդհանուր ժողով անցկացնելը կդառնա օրակարգային հարց, նաև կհամալրվի աշխատանքային խմբի կազմը:

 Հարցուպատասխանի փուլում քննարկմանը մասնակից համայնքների ղեկավարները, համայնքապետարանների ներկայացուցիչները Միության նախագահին հարցեր են հղել ՏԻՄ ոլորտում ներկայումս իրականացվող օրենսդրական փոփոխությունների վերաբերյալ: Մասնավորապես վարչատարածքային փոփոխություններին առնչվող խնդիրներով համայնքների ներկայացուցիչները բազում հարցեր են բարձրացրել: Միության նախագահ Էմին Երիցյանից հետաքրքրվել են համայնքների միավորման գործընթացի ներկայիս փուլի, դրա արդյունավետության, համայնքների ձայնը լսելի դարձնելու հետ կապված հարցերի առնչությամբ: