ՀՀ Արագածոտնի մարզի Ոսկեվազ համայնքում առաջիկա երկու օրվա ընթացքում նախատեսվում է օգնություն տրամադրել համայնքի միայնակ թոշակառուներին և հաշմանդամություն ունեցող բնակիչներին։

Համայնքի ղեկավար Հայկ Հովհաննիսյանի վստահեցմամբ՝ համայնքի բնակիչներն արտակարգ դրության օրերին զբաղված են գյուղատնտեսական աշխատանքներով: Ըստ նրա՝ բնակիչները  խստագույնս հետևում են մեկուսացման կանոններին:

Ոսկեվազ համայնքում կորոնավիրուսի վարակակիրներ չկան, բայց բնակիչները ինքնամեկուսացված են, տնից դուրս են գալիս միայն սնունդ ձեռք բերելու նպատակով:

Հարցին՝ համայնքապետարանի նախաձեռնությամբ ի՞նչ սոցիալական աջակցության ծրագրեր են գործում, քանի որ համայնքի ախտահանման աշխատանքներին զուգահեռ կարևոր է նաև անապահովների խնդիրների լուծումը. համայնքի ղեկավարը պատասխանեց. «Սոցիալապես անապահով ընտանիքներին անկախ իրավիճակից պարբերաբար տրվում են ֆինանսական օգնություններ։ Իսկ առաջիկա երկու օրվա ընթացքում նախատեսվում է օգնություն տրամադրել համայնքի միայնակ թոշակառուներին և հաշմանդամություն ունեցող բնակիչներին»:

Հայկ Հովհաննիսյանն ասաց, որ համյանքի բնակիչներին ցուցված է՝ կուտակումներ չլինեն, հավաքույթներ՝ ևս: Իսկ սգո արարողությունների ժամանակ հնարավորինս քիչ մարդիկ հավաքվեն՝ առավելագույնքը 20 մարդ։ Այն տունը, որտեղ կա հանգուցյալ, պարտադիր ախտահանվում է։

Համայնքապետարանը մշտապես կապի մեջ է համայնքի տեսուչի և բուժամբուլատորիայի հետ։

Ոսկեվազ համայնքում ամեն օր իրականացվում են վարակի կանխարգելման աշխատանքներ: Համայնքի ղեկավարը մանրամասնեց. «Վաղ առավոտյան կատարվում են ախտահանման աշխատանքներ։ Ախտահանություն է կատարվում սննդի խանութներում և հարակից տարածքներում, համայնքապետրանի շենքում, «Հայփոստ»-ի բաժանմունքում, հացի թխման կետերում, համայնքի կենտրոնում, ամբուլատորիայի տարածքում, դեղատներում, եկեղեցիում։ Ախտահանվում են նաև չգործող խանութների մուտքերը»։