Մարտի 17-ին տեղի է ունեցել «Խելացի քաղաքներ» թեմայով առցանց քննարկում՝ հայ-ֆրանսիական ապակենտրոնացված համագործակցության չորրորդ համաժողովին ընդառաջ: 

Հանդիպման նպատակն էր առանձնացնել այն թեմաները, որոնք ըստ մասնակիցների՝ նպատակահարմար է քննարկել «խելացի քաղաքներ» աշխատաժողովի ընթացքում:

«Խելացի քաղաքներ» թեմայով քննարկմանը մասնակցել են Հայաստանի համայնքների միության նախագահ Էմին Երիցյանը և Միության գործադիր տնօրենի տեղակալ Արաքս Միքայելյանը: Միության ներկայացուցիչները ներկայացրել են խելացի քաղաքներ աշխատանքային խմբի աշխատանքային ուղղվածությունը:

Իսսի-Լե-Մուլինո և Երևան քաղաքների կողմից ներկայացվել են քաղաքների կատարած աշխատանքները և տեսակետը, թե ելնելով իրենց քաղաքների առանձնահատկություններից՝ աշխատաժողովի ընթացքում ինչ թեմաներ կարող են քննարկվել:

«Խելացի քաղաքներ» թեմայով առցանց քննարկման ժամանակ ներկայացվել է նաև Վանաձորի, Գյումրու և Լեհաստանի Պիլա քաղաքների համայնքապետարանների համագործակցությամբ ԵՄ ֆինանսավորմամբ իրականացվող «Դաշինք՝ հանուն կայուն և կանաչ կառավարման» (ԿԿԿ ԴԱՇԻՆՔ), ABC.GoV: Alliance for Better City Governance) ծրագիրը: Հանդիպման մասնակիցներն առաջարկել են, որպեսզի հայ-ֆրանսիական ապակենտրոնացված համագործակցության չորրորդ համաժողովի ընթացքում այս ծրագիրը ներկայացվի՝ որպես քաղաքների համագործակցության հաջողված օրինակ: