Դեկտեմբերի 4-ին Հայաստանի համայնքների միությունում առցանց ձևաչափով տեղի է ունեցել աշխատանքային քննարկում՝ նվիրված Միության ֆոյդհայթայթման ռազմավարությանը:

Ինչպես հայտնի է COVD-19 համավարակի պայմաններում դրամաշնորհների տրամադրման քաղաքականությունը, առաջնահերթություններն ամբողջ աշխարհում փոխվել են, ուստի այս տեսանկյունից անհրաժեշտություն է առաջացել նաև վերանայել Միության ֆոնդհայթայթման ռազմավարությունը:

Դեկտեմբերի 9-ին Միության նախաձեռնությամբ կանցկացվի քննարկում համայնքների ներկայացուցիչների հետ՝ կարիքների գնահատման ու ծրագրերի շուրջ։ Քննարկման նպատակն է անմիջապես համայնքներից ստանալ տեղեկություններ հետպատերազմական կարիքների մասին: 

Օրեր առաջ կազմակերպվեց Ֆրանսիայի պետական մարմինների, ռեգիոնների, դերարտամենտների, մետրոպոլիաների ու համայնքների ներկայացուցիչների հետ հանդիպում, որի ընթացքում ֆրանսիացի գործընկերների կողմից ևս բարձրացվել է համայնքներին հասցեական ու թիրախային աջակցություն ցուցաբերելու հարցը: Համայնքների կարիքների գնահատումը անհրաժեշտ է նաև հետագայում աջակցության պլանավորման համար՝ անկախ նրանից, թե տվյալ համայնքը բարեկամական կապեր ունի, թե ոչ ֆրանսիական համայնքների հետ: Համայնքի կարիքների քննարկումը նախատեսվում է անցկացնել կարճաժամկետ, միջնաժամկետ և երկարաժամկետ կտրվածքով:

Կարևոր է նաև պոտենցյալ դոնորների և դրամաշնորհների քարտեզագրման հարցը, ինչի ուղղությամբ Միության մասնագետները կատարում են ամենօրյա քարտեզագրման աշխատանքներ: Քննարկման ընթացքում կարևորվել է այս հարցում նաև միջազգային գործընկերների՝ ռեգիոնների, համայնքների հետ համագործակցությունը:

Առաջիկայում կկազմակերպվեն նաև դոնորների հետ դեմ առ դեմ հանդիպումներ (հեռավար), ավելի դինամիկ հարաբերություններ կհաստատվեն սփյուռքի կազմակերպությունների, համայնքների հետ: