Ֆրանսիայի գյուղական համայնքների ղեկավարների ասոցիացիայի պատվիրակությունը հուլիսի 27-ին հյուրընկալվեց Փարաքար համայնքում:

Հայաստանի համայնքների միության (ՀՀՄ) և Ֆրանսիայի գյուղական համայնքների ղեկավարների ասոցիացիայի միջև կնքվել է համագործակցության հուշագիր, որի շրջանակներում էլ ֆրանսիացի մի շարք համայնքապետեր այցելել են Հայաստան: Ֆրանսիայի գյուղական համայնքների ղեկավարների ասոցիացիայի նախագահ, Գարժիլես-Դամպիերի համայնքապետ Վանիկ Բերբերյանի գլխավորությամբ պատվիրակության կազմում են Օտրակի համայնքապետ Քրիստոֆ Բեդոսոսյանը, Շամալոկի համայնքապետ Միշել Վարդանյանը, Բորըգարդ դե Տարրասոնի համայնքապետ Լիոնել Արմաղանյանը, Դոբյոֆ լա Կամպանյի համայնքապետ Լորանս Բուսիյեղին, Գրավրոն-Սեﬔրվիլի համայնքապետ Կլեր Կարրիեր-Գոդբուն, Արսոյի համայնքապետ Բրյունո Բետընոն:

Փարաքար համայնքի ղեկավար Սամվել Վարդանյանի ուղեկցությամբ ֆրանսիացի գործընկերներն այցելեցին Փարաքարի մանկապարտեզ, արվեստի դպրոց: Ունկնդրեցին արվեստի դպրոցի սաների երաժշտական և պարային կատարումները: Այնուհետև համայնքապետարանի շենքում տեղի ունեցավ ՏԻՄ ոլորտում ՀՀ-ում և Ֆրանսիայում գոյություն ունեցող խնդիրների, ՀՀՄ-ի և Ֆրանսիայի գյուղական համայնքների ղեկավարների ասոցիացիայի միջև հետագա համագործակցության շրջանակներում քննարկում:

ՀՀՄ նախագահ Էմին Երիցյանը հայտնեց՝ արդեն երկար ժամանակ փորձում ենք նաև ծրագրերով ակտիվացնել միությունը, ՀՀՄ-ն փոխում է իր ինստիտուցիոնալ կառուցվածքը. «Դրա հետ կապված աշխատում ենք ԵԽ-ի և Շվեյցարական զարգացան հիմնադրամի հետ, ուժեղացնում ենք  մեր մշտական հանձնաժողովները, այդ թվում նաև գյուղական համայնքներինը»:

Պարոն Երիցյանի փոխանցմամբ՝ կան գյուղական համայնքների համար տիպական ծրագրեր: Նա հայտնեց, որ ցանկանում են վերականգնել գյուղական ֆորումների անցկացման ավանդույթը: Այնուհետև առաջարկեց. «Միգուցե ֆրանկոֆոնիայի գագաթաժողովից առաջ՝ հոկտեմբերի 6-ին, եթե այցելեք, կազմակերպենք գյուղական ֆորում, որը նշանակալից միջոցառում կլինի»:

ՀՀՄ գործադիր տնօրեն Նատալյա Լափաուրին էլ ներկայացրեց միության ստեղծման պատմությունը և ՀՀ-ում տեղական ինքնակառավարման ընդհանուր նկարագիրը:

ՀՀՄ ֆոնդհայթայթման և ծրագրերի ղեկավար Վահրամ Վարդանյանը որոշ տեղեկություններ տրամադրեց միության կողմից իրականացվող կարևոր ծրագրերի մասին:

Քննարկման ընթացքում անդրադարձ կատարվեց նաև ՀՀ-ում և Ֆրանսիայում համայնքների անկախության հարցերին: Էմին Երիցյանն այս առիթով նշեց. «2005-ի Սահմանադրությամբ, նաև վերջին փոփոխություններով, համայնքի ղեկավարի լիազորությունները որևէ մեկը չի կարող վաղաժամ դադարեցնել  ՝ ո′չ մունիցիպալ խորհուրդը, ո′չ բնակչությունը՝ հանրաքվեի միջոցով, ո′չ կառավարությունը: Իհարկե, վերջերս ունենք երևույթներ, երբ ստիպում են համայնքի ղեկավարին հրաժարական տալ: Գոնե դա 10-15-ից չանցավ»:

Պարոն Երիցյանը բարձրացրեց նաև համայնքի ղեկավարի ժամանակավոր պաշտոնակատարի նշանակման հարցում առաջացած խնդիրները. «Երբ համայնքի ղեկավարը հրաժարական է տալիս, այժմ կառավարությունը նշանակում է պաշտոնակատար: Մեզ համար դա նշանակում է ուղիղ պետական կառավարում: Մենք առաջարկում ենք, որ պաշտոնակատար դառնա տեղակալը, կամ էլ, եթե դա չի լինում, մունիցիպալ խորհուրդը որևէ մեկին նշանակի, այս դեպքում էլ կառավարության միջամտությունը բացառելու համար»:

Համայնքների անկախության հարցով Վանիկ Բերբերյանը փաստեց. «Մշտադիտարկումները ցույց են տալիս, որ ՏԻՄ-երի հետ կապված Ֆրանսիան այնքան էլ լավ վիճակում չէ»:

Էմին Երիցյանն էլ կարծիք հայտնեց՝ գուցե շատ հարցերում ՀՀ-ում տեղական իշխանություններն ավելի անկախ են, քան ֆրանսիայում: