2016թ. հոկտեմբերի 20-ին Կոնգրեսի Տեղական իշխանությունների պալատը քննարկեց տեղեկատվական զեկույց՝ կապված Հայաստանում սեպտեմբերի 18-ին անցկացված տեղական ընտրությունների հետ: Այս քվեարկությունը երկրում առաջինն էր՝  2016թ. հուլիսին Երևանում ոստիկանության տարածքի բռնազավթումից հետո: Չնայած որ Հայաստանում 2016թ.-ին արդեն ընդունվել է նոր Ընտրական օրենսգիրք, իսկ դեռ 2015թ.-ին երկրում տեղի էին ունեցել սահմանադրական բարեփոխումներ, սեպտեմբերի 18-ի տեղական ընտրությունները անցկացվում էին 2011թ.-ի Ընտրական օրենսգրքով:  Սա հանգեցրեց իրավական հարթության որոշ անճշտությունների և «անխուսափելի հետևանքներ ունեցավ ընտրական ընդհանուր մթնոլորտի վրա»,- նշեց Կոնգրեսի զեկուցող Լիիսա Անսալան (Ֆինլանդիա): Ընդհանուր առմամբ, դիտորդական խումբը գնահատեց, որ ընտրությունները տեխնիկապես լավ էին նախապատրաստված և ընդհանուր առմամբ համապատասխանում էին միջազգային չափանիշներին: Միևնույն ժամանակ տիկին Անսալան ընդգծեց այդ ընտրություններում քաղաքական մրցակցության ցածր մակարդակը, և որ շատ թեկնածուներ դուրս էին մնացել դեռ քարոզարշավի ժամանակ: «Արդյունքը եղավ ընտրությունների հանդեպ հանրային հետաքրքրվածության ցածր մակարդակը»,- նշեց զեկուցողը: