Փետրվարի 25-ին Ստրասբուրգում տեղի ունեցավ Տեղական ժողովրդավարության եվրոպական շաբաթվա տարեկան կոորդինացիոն հանդիպումը: Մասնակցեցին գործընկեր համայնքների և ասոցիացիաների ներկայացուցիչները:  Հայաստանի համայնքների միության պատվիրակությունը ևս մասնակցեց հանդիպմանը: Նշենք, որ տարեկան կոորդինացիոն հանդիպման հիմնական նպատակն է 2019-ի արդյունքների ամփոփումն ու գնահատումը և 2020-ի համար թեմաների առաջադրումը:

Տեղական ժողովրդավարության եվրոպական շաբաթն անցկացվում է  յուրաքանչյուր տարի՝ ողջ տարվա ընթացքում: Հիմնական միջոցառումները տեղի են ունենում հոկտեմբերի 15-ի շաբաթվա ընթացքում: Այս համաեվրոպական միջոցառմանն իրենց ներդրումն են ունենում ազգային ասոցիացիաները, գործընկեր համայնքները, քաղաքացիական հասարակության ներկայացուցիչները: Ներկայումս Տեղական ժողովրդավարության շաբաթվա գործընկերներն են 86 կազմակերպություններ 18 երկրներից: Հայաստանի համայնքների միությունը ևս գործընկեր կազմակերպություն է:

Ստրասբուրգում կայացած կոորդինացիոն հանդիպման ընթացքում մասնակիցները փաստեցին՝ 2019-ն աչքի է ընկել ակտիվությամբ. իրականացվել են 250-ից ավելի միջոցառումներ:

Կոորդինացիոն հանդիպմանը ներկայացվեց նաև 2019 թվականի գնահատման զեկույցը: Գործընկեր կազմակերպությունները ցուցադրեին տարվա ընթացքում իրենց կատարած միջոցառումները:

Այնուհետև տեղի ունեցավ մտքերի փոխանակում և մտագրոհ, ինչի արդյունքում կորոշվի 2020-ին տեղական ժողովրդավարության եվրոպական շաբաթվա համար տարվա հիմնական թեման:

Կոորդինացիոն հանդիպումն ավարտվեց «Տեղական ժողովրդավարության եվրոպական շաբաթվա գործընկեր 2019» խորագրով մրցանակաբաշխությամբ: Առաջին եռյակում Թուրքիայի քաղաքներն են՝ Ահմեդբեյը, Ավցիլարը և Բեշիկթաշը: