ՀՀ արդարադատության նախարարի տեղակալ Քրիստիննե Գրիգորյանը մարտի 4-ին Երևանում անցկացված «Քաղաքական բարեվարքությունը և էթիկան տեղական կառավարման համակարգում» խորագրով համաժողովին հայտարարեց, որ ՀՀ կառավարության հաստատած՝ կոռուպցիայի դեմ պայքարի ռազմավարության կարևորագույն ուղղությունների մեկը համայնքային, տարածքային, տեղական մակարդակով կոռուպցիայի դեմ պայքարն է և վստահեցրեց, որ սա նոր ռազմավարության համեմատական առնչությունն է:

Նախարարի տեղակալը նաև հայտարարեց. «Ընդհանրապես մեր ուսումնասիրությունը ցույց է տալիս, որ նախկինում կոռուպցիայի դեմ պայքարի՝ ուղղակի վերևից ներքև մոտեցումները կարող են լրացվել հորիզոնական մոտեցմամբ»:

Քրիստիննե Գրիգորյանը վերահաստատեց, որ կառավարության համար կոռուպցիայի դեմ պայքարն առաջնահերթություն է: Միևնույն ժամանակ նշեց. «Հեռու ենք այն մտքից, որ միայն քաղաքական կամքը բավարար է կոռուպցիայի դեպ պայքարում: Սրա համար տեղական և կենտրոնական մակարդակում ինստիտուցիոնալ զարգացում է անհրաժեշտ:

Նշենք, որ «Քաղաքական բարեվարքությունը և էթիկան տեղական կառավարման համակարգում» խորագրով համաժողովն իրականացվեց Եվրոպայի խորհրդի  տեղական և տարածքային իշխանությունների կոնգրեսի (Կոնգրես) կողմից «Հայաստանի համայնքների միաության հզորացում և թափանցիկ, մասնակցային տեղական ինքնակառավարումը Հայաստանում» ծրագրի շրջանակներում: Այն իրականացվում է Շվեյցարիայի զարգացման և համագործակցության գործակալության ֆինանսական աջակցությամբ՝ Եվրոպայի խորհրդի Տեղական և տարածքային իշխանությունների կոնգրեսի և Եվրոպայի խորհրդի երևանյան գրասենյակի կողմից՝ Եվրոպայի խորհրդի Հայաստանի համար իրականացվող գործողությունների 2019-2022թթ․ ծրագրի շրջանակներում:

Համաժողովի նպատակն է քննարկել տեղական ընտրված ներկայացուցիչների քաղաքական բարեվարքությանն առնչվող խնդիրները և նախանշել տեղական ինքնակառավարման մարմիններում հակակոռուպցիոն քաղաքականության իրականացմանն աջակցելուն ուղղված անհրաժեշտ քայլերը: