Հունվարի 11-ին Երևանում տեղի ունեցավ Հայաստանի համայնքների միության հանրապետական խորհրդի նիստը:

Նիստին ներկա տասնյակ համայնքի ղեկավարներ և փորձագետներ քննարկեցին տեղական ինքնակառավարման ոլորտին առնչվող շրջանառության մեջ գտնվող օրենսդրական ակտերի, նախագծերի վերաբերյալ Միության Հանրապետական խորհրդի դիրքորոշմանն առնչվող հարցեր, տարբեր միջազգային հարթակներում Հայաստանի ներկայացվածությանն առնչվող և ներքին կազմակերպական խնդիրներ:

Միության Հանրապետական խորհուրդը ձևավորվում, և դրա կազմն ընտրվում է Ընդհանուր ժողովի կողմից՝ հինգ տարի ժամկետով: Հանրապետական խորհրդի նիստերը գումարվում են տարեկան առնվազն մեկ անգամ: Միության անդամ յուրաքանչյուր քաղաքային համայնքի ղեկավար, քաղաքային բնակավայր պարունակող համայնքի ղեկավար Հանրապետական խորհրդի անդամ է: Հանրապետական խորհրդի անդամ գյուղական համայնքների թիվը հավասար է խորհրդի անդամ քաղաքային համայնքների թվին՝ յուրաքանչյուր մարզից 4-8 համայնքի ներկայացվածությամբ: Հանրապետական խորհուրդը նաև սահմանել է հատուկ քվոտա՝ իր կազմում համայնքի կին ղեկավարների ներկայացվածությունն ապահովելու նպատակով: