Չարենցավանում ստեղծվել է կորոնավիրուսի կանխարգելման միջոցառումները համակարգող շտաբ և արագ արձագանքման խումբ. Չարենցավան համայնքի ղեկավար

Չարենցավանում ստեղծվել է կորոնավիրուսի կանխարգելման միջոցառումները համակարգող շտաբ և արագ արձագանքման խումբ. Չարենցավան համայնքի ղեկավար

20.03.2020

Հայաստանի համայնքների միության նոր նախաձեռնության շրջանակներում «Համայնքներն արտակարգ դրության ժամանակ» խորագրի ներքո ներկայացնում ենք, թե այժմ ինչ իրավիճակ է տիրում Չարենցավան համայնքում:

Չարենցավան համայնքի ղեկավար Հակոբ Շահգալդյանը ներկայացնում է, թե համայնքում ինչ աշխատանքներ են կատարվում կորոնավիրուսի կանխարգելման համար:

-Այս օրերին ինչպե՞ս է ընթանում համայնքային կյանքը Չարենցավանում:

-Չարենցավանում կյանքն ընթանում է բնականոն հունով։ Փողոցները մարդաշատ չեն, բայց  դատարկ էլ չեն։ Խանութներում հերթեր չկան, ապրանքն էլ բավարար է։ Աշխատում են սուպերմարկետներն ու մթերային խանութները, փակ են որոշ հագուստի խանութներ։ Դեղատներում կան ախտահանիչ նյութեր, շուտ վերջանում են պաշտպանիչ դիմակները, բայց համայնքապետարանը ձեռք է բերել մեծ քանակությամբ դիմակներ՝ 10,000 հատից ավելի, որոնց մի մասն այսօր տրամադրվեց բժշկական կենտրոնին (5000 հատ), մի մասն էլ բաժանվում է բնակչությանը։ Այսօր նաև մանկապարտեզներում պահեստավորած սնունդը բաժանեցինք համայնքի սոցիալապես անապահով ընտանիքներին։

-Համայնքում ի՞նչ միջոցառումներ են իրականացվում կորոնավիրուսի կանխարգելման համար:

-Համայնքում ստեղծվել է ձեռնարկվող միջոցառումները համակարգող շտաբ և արագ արձագանքման խումբ: Կազմակերպվել են մի շարք նիստեր, որոնց ընթացքում քննարկվել են անելիքները։ Չորեքշաբթի օրվանից համայնքում մեկնարկել են մուտքերի ու վերելակների ախտահանման միջոցառումները։ Քանի որ արտակարգ դրության հայտարարումից հետո՝ 4 օր շարունակ, համայնքում եղանակն անբարենպաստ էր՝ անդադար տեղումներ էին ձյան և անձրևի տեսքով, փողոցների ախտահանումն անարդյունավետ չէր լինի, բայց այսօր, քանի որ տեղումներ չեն սպասվում, իրականացրել ենք կենտրոնական փողոցների և ներթաղամասային ճանապարհների ախտահանում։ Դեռ երեկվանից կոչ ենք արել վարորդներին և հետիոտներին 12։00-16։00-ն զգուշանալ փողոցներում երթևեկելիս։ Համայնքն ունի անհրաժեշտ քանակությամբ ախտահանիչ նյութեր արտակարգ դրության ամբողջ ընթացքում համալիր միջոցառումներ կատարելու համար։ Վերահսկողություն ենք սահմանել նաև հանդիսությունների և սգո սրահներում կազմակերպվող արարողությունների նկատմամբ։

-Ի՞նչ ռեժիմով է աշխատում համայնքապետարանը արտակարգ դրության պայմաններում:

-Համայնքապետարանն աշխատում է արտակարգ ռեժիմով։ Աշխատանքի են գալիս բոլորը, բացառությամբ նրանց, ովքեր ունեն նախադպրոցական տարիքի երեխաներ կամ առողջական խնդիրներ ունեցող 60 տարեկանից բարձր աշխատակիցներ են։ Շենքում կան ախտահանիչ նյութեր։ Չնայած այս ամենին՝ համայնքի բնակիչներին բազմիցս կոչ ենք արել համայնքապետարան գալ միայն ծայրահեղ անհրաժեշտության դեպքում։ Չեմ կարող ասել, որ հիմա բնակիչներ չեն գալիս, բայց առաջին օրերի համեմատ՝ մարդկանց հոսքը դանդաղել է, աշխատում են անհրաժեշտ հարցերի պատասխանները ճշտել զանգերով կամ էլ օնլայն հարթակներում։ Ակտիվ  աշխատում են մեր ֆեյսբուքյան էջը և պաշտոնական կայքը՝ պատասխանելով բնակչությանը հուզող բոլոր հարցերին։

-Ի՞նչ է արվում համայնքի երեխաների՝ առցանց ուսուցումն ապահովելու համար:

-Ես տեղյակ եմ, որ ԿԳՄՍ նախարարությունը հրաշալի նախաձեռնությամբ է հանդես եկել՝ հեռուստատեսային և առցանց դասեր ներկայացնելով աշակերտներին։ Դրանցից օգտվում են նաև մեր համայնքի դպրոցականները։ Գրեթե բոլոր դասարաններում՝ օնլայն հարթակներում առկա խմբերում, լինում են դասեր, հանձնարարություններ, քննարկումներ։ Հետաքրքիր է, որ մեր համայնքում նախադպրոցական հաստատությունները ևս իրականացնում են նմանատիպ աշխատանքներ, այսօր արդեն մի քանի մանկապարտեզ տեղեկացրել է, որ պարապմունքների կուտակումներից խուսափելու համար սկսել է առցանց ուսուցումը։ Կարծում եմ՝ արտակարգ դրությունը նոր հնարավորություններ ստեղծեց օնլայն կրթության մեխանիզմները կատարելագործելու համար։ Միգուցե այսպես աշակերտներն ավելի հեշտությամբ կինտեգրվեն կրթության գործընթացին, քանի որ տեղեկատվական տեխնոլոգիաները նրանց առօրյայի մեծ մասն են։

-Համայնքում գործո՞ւմ է արդյոք թեժ գիծ, որով համայնքի բնակիչները կարող են կորոնավիրուսին և առողջական խնդիրներին առնչվող՝ իրենց հուզող հարցերի մասին տեղեկատվություն ստանալ:

-Համայնքապետարանի քաղաքային հեռախոսահամարը՝ (0226)-4-34-34, աշխատում է, բնակիչները սակայն ինֆորմացիա հիմնականում ձգտում են ստանալ սոցիալական կայքերի միջոցով։ Մշտապես հասանելի են նաև համայնքապետարանի աշխատակիցների հեռախոսահամարները։

-Համայնքն այս պահին հատկապես ո՞ր հարցում օգնության կարիք ունի:

-Այս պահին առանձնահատուկ օգնության կարիք չունենք։ Կարողանում ենք արագ արձագանքել բնակիչներին, ունենք պահեստավորած ախտահանիչ նյութեր, ունենք դիմակներ։

-Ձեր գնահատմամբ՝ համայնքներն այսօր պատրա՞ստ են դիմակայելու կորոնավիրուսին:

-Եթե այսպես երկար շարունակվի, կարծում եմ բոլոր համայնքներում էլ խնդիրներ կառաջանան։

 


NEWS

Աշտարակ համայնքում բնակիչները համայնքապետարանին առաջարկում են օգնություն՝ կորոնավիրուսի կանխարգելման աշխատանքների կազմակերպման հարցում
Աշտարակ համայնքում բնակիչները համայնքապետարանին առաջարկում են օգնություն՝ կորոնավիրուսի կանխարգելման աշխատանքների կազմակերպման հարցում

19:17

03 04 2020

ՀՀ Արագածոտնի մարզի Աշտարակ համայնքի բոլոր մուտքերին ու ելքերին, համայնքի ամբողջ տարածքում...

Արարատ քաղաքի բնակիչները «բավարար» չափով են հետևում ինքնամեկուսացման կանոններին. Հայկ Հայկյան
Արարատ քաղաքի բնակիչները «բավարար» չափով են հետևում ինքնամեկուսացման կանոններին. Հայկ Հայկյան

14:25

03 04 2020

ՀՀ Արարատի մարզի Արարատ քաղաքում ինքնամեկուսացման կանոնները քաղաքացիները պահպանում են բավարար...

«Գյուղի փողոցներում գրեթե մարդ չկա, խանութները փակ են». Փարպի համայնքի ղեկավարը՝ համայնքում տիրող իրավիճակի և ախտահանման աշխատանքների մասին
«Գյուղի փողոցներում գրեթե մարդ չկա, խանութները փակ են». Փարպի համայնքի ղեկավարը՝ համայնքում տիրող իրավիճակի և ախտահանման աշխատանքների մասին

19:18

02 04 2020

Հայաստանի համայնքների միությունը շարունակում է ներկայացնել, թե արտակարգ դրության օրերին...

«Անձամբ եմ շրջում համայնքում և հորդորում բնակիչներին տանը մնալ». Եղեգիս համայնքի ղեկավար
«Անձամբ եմ շրջում համայնքում և հորդորում բնակիչներին տանը մնալ». Եղեգիս համայնքի ղեկավար

12:42

02 04 2020

Հայաստանի համայնքների միությունն ամենօրյա գրաֆիկով ներկայացնում է, թե ինչ իրավիճակ է տիրում ՀՀ...

«Համայնքապետարանի աշխատակիցների կողմից համայնքի մուտքերին եւ ելքերին իրականացվում է հսկողություն». Սարուխան համանքի ղեկավար
«Համայնքապետարանի աշխատակիցների կողմից համայնքի մուտքերին եւ ելքերին իրականացվում է հսկողություն». Սարուխան համանքի ղեկավար

19:24

01 04 2020

Ինչպե՞ս է արտակարգ դրության օրերին անցնում համայնքային կյանքը ՀՀ Գեղարքունիքի մարզի Սարուխան...

«Այսօր անձի գիտակցության, իսկական  քաղաքացիական պահվածքի խնդիր ունենք». Նոր կյանք համայնքի ղեկավար
«Այսօր անձի գիտակցության, իսկական քաղաքացիական պահվածքի խնդիր ունենք». Նոր կյանք համայնքի ղեկավար

13:33

01 04 2020

Հայաստանի համայնքների միությունը «Համայնքներն արտակարգ դրության ժամանակ» խորագրով...