Փետրվարի 10-ին տեղի է ունեցել Եվրոպայի խորհրդի Տեղական և տարածքային իշխանությունների կոնգրեսի (ԵԽ Կոնգրես) Մոնիտորինգի հանձնաժողովի հեռավար նիստը, որին մասնակցել է նաև Կոնգրեսում հայկական պատվիրակության ղեկավար, Հայաստանի համայնքների միության նախագահ Էմին Երիցյանը:

Մոնիտորինգի հանձնաժողովի նիստի օրակարգային հարցերից էր նաև 2021-ին Հայաստանում, Վրաստանում, Դանիայում և Մարոկկոյում կայացած տեղական ինքնակառավարման մարմինների ընտրությունների արդյունքների ամփոփումը: Մոնիտորինգի հանձնաժողովը քննարկել է Հայաստանում 2021 թվականի դեկտեմբերի 5-ին կայացած ՏԻՄ ընտրւթյունների վերաբերյալ զեկույցի նախագիծը: Այն կներառվի Ստրասբուրգում մարտի 22-24-ը կայանալիք Կոնգրեսի 42-րդ նստաշրջանի օրակարգում:

Հիշեցնենք՝ ԵԽ կոնգրեսի  պատվիրակությունը՝ զեկուցող և Վենետիկի հանձնաժողովի Ժողովրդավարական ընտրությունների խորհրդի գծով Կոնգրեսի ներկայացուցիչ Ստյուարտ Դիքսոնի (Միացյալ Թագավորություն, ILDG) գլխավորությամբ իրականացրել է Հայաստանում դեկտեմբերի 5-ին անցկացված ՏԻՄ  ընտրությունների գնահատման առաքելություն: