Օգոստոսի 20-ին Սպիտակ  համայնքում «Քաղաքապետերի դաշնագիր՝ Արևելք» ծրագրի կողմից պարգևատրվել են «ԵՄ Կայուն էներգիայի շաբաթ-2025»-ի շրջանակներում համայնքում անցկացված մրցույթների հաղթողները և կայուն էներգիայի օրերի ակտիվ մասնակիցները։

Արդեն ավանդական դարձած ԵՄ Կայուն էներգիայի շաբաթն (EU Sustainable Energy Week) այս տարի անցկացվեց հունիսի 10-ից 12-ը՝ «Արդար և մրցունակ կանաչ անցման խթանում» խորագրով:

Կայուն էներգիայի շաբաթվա անցկացման նպատակն է բարձրացնել համայնքների բնակիչների և շահառուների (հատկապես երեխաների և երիտասարդների) տեղեկացվածությունը համայնքների կայուն և կանաչ զարգացման նպատակների, ինչպես նաև էներգետիկ ռեսուրսների արդյունավետ օգտագործման, էներգախնայողության, վերականգնվող էներգետիկ ռեսուրսների լայնատարած օգտագործման, կանաչ զարգացման, կլիմայի փոփոխության մեղմման և հարմարվողականության հիմնախնդիրների վերաբերյալ:

Սպիտակ համայնքում այս տարի Կայուն էներգիայի շաբաթվա շրջանակում իրականացվել է 5 միջոցառում՝ նկարչական մրցույթ, ծառատունկ, ցուցահանդես, հեծանվարշավ, ամփոփիչ միջոցառում, որին մասնակցել է շուրջ 200 մարդ։

Սպիտակի համայնքապետարանում կազմակերպված պարգևատրման արարողության ժամանակ «Քաղաքապետերի դաշնագիր՝ Արևելք» ծրագրի Հայաստանի ազգային փորձագետ Արտեմ Խարազյանը նշեց, որ ծրագիրը ՀՀ-ում աշխատում է Սպիտակ համայնքի և ևս 29 համայնքի հետ․ «Սպիտակն առաջին համայնքներից է, որը 2014-ին միացել է Դաշնագրին։ Մեր նպատակն է օգնել, որ համայնքները մշակեն և իրականացնեն կայուն և կանաչ զարգացման ռազմավարությունները։ Սպիտակն իր գործողությունների ծրագիրը մշակել ու հաստատել է»։

Սպիտակի համայնքապետարանի աշխատակազմի քարտուղար Ազգանուշ Ֆրանգյանը նշեց՝ համայնքն ամեն տարի միանում է ԵՄ կայուն էներգիայի շաբաթվան ու շնորհակալություն հայտնեց երիտասարդների և երեխաների շրջանում դեպի բնությունը և էներգիայի աղբյուրը սեր սերմանելու համար։

Սպիտակի համայնքապետարանում կազմակերպված պարգևատրման արարողության ժամանակ ԵՄ կայուն էներգիայի շաբաթվան ակտիվ մասնակցության և տարբեր մրցույթներում հաղթելու կապակցությամբ պարգևատրվեցին Թամարա Սահակյանը, Ալիսա Ղուկասյանը, Գրետա Սարդարյանը, Լիլիթ Թորոսյանը, Անահիտ Սահակյանը, Լյուդա Հոռոմսիմյանը։