Կարևորելով «Քաղաքապետերի դաշնագիր հանուն կլիմայի և էներգիայի» նախաձեռնությանն անդամակցող համայնքներում էներգետիկ կառավարման համակարգի ներդրման և համայնքային էներգետիկ կառավարիչների ինստիտուտի ձևավորման խնդիրը և դիտարկելով էներգետիկ կառավարումը՝ որպես համայնքային էներգետիկ ռազմավարությունների մշակման, իրականացման և մշտադիտարկման հիմնական գրավականներից մեկը, ԵՀ «Քաղաքապետերի դաշնագիր՝ Արևելք» ծրագրի շրջանակներում կազմակերպվող կարողությունների ամրապնդման հաջորդ ուսուցողական սեմինարը նվիրված կլինի այս թեմային:

ԵՀ «Քաղաքապետերի դաշնագիր՝ Արևելք» ծրագրի հայաստանյան գործընկերները Հայաստանի համայնքների միությունն է։

Միջոցառումը մասնակիցների համար առավել տեղեկատվական և օգտակար դարձնելու համար ծրագրի կողմից որոշում է կայացվել սեմինարի օրակարգը ձևակերպել այնպես, որ այն հնարավորինս արտացոլի համայնքային էներգետիկ կառավարման հետ կապված Հայաստանում Դաշնագրին անդամակցող համայնքներին հետաքրքրող հարցերի շրջանակը:

Այդ նպատակով կազմակերպվել է առցանց հարցում, որին մասնակցել են 14 համայնքներ՝ Երևան, Ապարան, Վանաձոր, Ջերմուկ, Փարաքար, Գորիս, Տաշիր, Վայք, Աշտարակ, Ակունք, Սևան, Իջևան, Արթիկ և Մասիս։

Հարցման արդյունքում նույնականացվել են համայնքային էներգիայի կառավարման կարևորագույն ուղղությունները և առաջարկվող թեմաներն՝ ըստ կարևորության հետևյալ կերպ.

Էներգետիկ կառավարումը էլեկտրասպառող ենթակառուցվածքներում (օրինակ՝ փողոցային լուսավորության համակարգում)` 11 միավոր:

ԵՄ երկրներում համայնքային էներգիայի կառավարման արդյունավետ համակարգի ստեղծման օրինակներ՝ 10 միավոր:

Համայնքային էներգետիկ կառավարման քաղաքականության ձևավորում՝ 8 միավոր:

Աշխատանքի պլանավորում և կազմակերպում, գործողության ծրագրի մշակում՝ 8 միավոր:

Էներգետիկ կառավարումը շենքերում՝ 8 միավոր:

Արևելյան գործընկերության երկրներում համայնքային էներգիայի կառավարման արդյունավետ համակարգի ստեղծման օրինակներ՝ 8 միավոր:

Ելակետային իրավիճակի գնահատում և էներգետիկ կառավարման խնդիրների ձևակերպում և ընկալում` 7 միավոր:

Էներգիայի օգտագործման կառավարում մոնիտորինգի և հաշվառման միջոցով՝ 7 միավոր:

Էներգիայի կառավարման առավելությունները՝ 7 միավոր:

Կազմակերպչական կառույցների ստեղծում, էներգետիկ կառավարչի նշանակում՝ 6 միավոր:

Ինչպե՞ս սահմանել էներգախնայողության թիրախները կամ էներգասպառման սահմանաչափերը՝ 6 միավոր:

Շենքերում էներգետիկ աուդիտի անցկացման կարգը՝ 4 միավոր:

Որոշ մասնակիցների կողմից առաջարկվել են նաև հետևյալ հավելյալ թեմաներ.

ԵՄ երկրներում էներգիայի կառավարման տեղեկատվական համակարգի (EMIS) կիրառման հաջողված փորձի ներկայացում:

Տեղական էներգիայի արտադրությունը որպես համայնքային էներգետիկ կառավարման բաղադրիչ:

Էներգիայի կառավարում տրանսպորտում:

Այսպիսով, երկրորդ ուսուցողական սեմինարի օրակարգը (անհրաժեշտության դեպքում նաև հաջորդ սեմինարների օրակարգերը) կձևավորվի՝ հաշվի առնելով ստացված արդյունքները: