ՀՀ Արարատի մարզի Արարատ քաղաքում ինքնամեկուսացման կանոնները քաղաքացիները պահպանում են բավարար կերպով: Համայնքի ղեկավար Հայկ Հայկյանը մեզ հետ զրույցում նշեց, որ եթե մի փոքր ակտիվություն է նկատվում, ապա դա միմիայն կապված է թոշակներ, նպաստներ ստանալու հետ կամ կապված սոցիալական ապահովման խնդիրներին առնչվող հարցերին:

Հայաստանի համայնքների միությունը «Համայնքներն արտակարգ դրության ժամանակ» նախաձեռնության շրջանակներում արդեն ներկայացրել է, թե մի քանի տասնյակ համայնքներում ինչպես են մարդիկ ապրում այս օրերին, համայնքապետարանն ինչ միջոցներ է ձեռնարկում վարակի կանխարգելման համար:

Արարատ համայնքի ղեկավարի վստահեցմամբ՝ համայնքապետարանն իր ենթակայությամբ գործող Կոմունալ ծառայության հետ իրականացնում է ախտահաման աշխատանքներ: Երեք օրը մեկ անգամ ախտահանվում են բոլոր փողոցները, մայթերը, իսկ երկու օրը մեկ անգամ ախտահանվում են բոլոր շենքերի մուտքերն և շքամուտքերը:

Մեր հարցին՝ համայնքն այս օրերին ի՞նչ օգնության կարիք ունի, Հայկ Հայկյանը պատասխանեց. «Այս օրերին համայնքն օգնության կարիք չունի: Ինչպես արդեն նշել էինք, նախկին օրերին օգնություն էր տրամադրվել «ԳեոՊրոՄայնինգ Գոլդ» ՍՊԸ-ի կողմից՝ 195 ընտանիքների, որն ընդգրկում էր միայնակ թոշակառուներին, հրատապ նպաստառուներին և տեղաշարժման խնդիր ունեցող անձանց, ինչպես նաև՝ մի քանի օր առաջ իր օգնությունը ցուցաբերեց ՀՀ ԱԺ-ի նախկին պատգամավոր՝ Արայիկ Գրիգորյանը: Նա 195 լ սպիրտ էր տրամադրել բնակարանների ախտահանման և ձեռքերի լվացման համար: Այսօր ևս ախտահանման նպատակով պարոն Գրիգորյանի կողմից տրամադրվելու է սպիրտ համայնքի ազգաբնակչությանը, ըստ հրատապ նպաստառուների և տեղաշարժման խնդիր ունեցողների, արդեն ՝ 320 լիտրի չափով, յուրաքանչյուր նշված ընտանիքներին՝ 1 լիտր չափաբաժնով:

Հետաքրքրվեցինք՝ համայնքի մուտքն ու ելքը վերահսկվո՞ւմ է, Արարատ համայնքի ղեկավարը պատասխանեց. «Համայնքի մուտքերին և ելքերին հսկողություն չի իրականացվում, իսկ համայնքի ներսում ոստիկանական խմբերը ճշգրտորեն իրականացնում են իրենց պարտականությունները՝ համաձայն պարետատան կողմից սահմանաված դրույթների, տեղաշարժման թերթիկների ստուգմամբ և այլ աշխատանքներով: Հետևողական են մեքենայով տեղաշարժվողների թերթիկների առկայության, ուղևորների թվի, համայնքում հետիոտների տեղաշարժին՝ ըստ պարետատան կողմից սահմանված որոշման դրույթների»: