Հայաստանի համայնքների միությունը «Համայնքներն արտակարգ դրության ժամանակ» խորագրով նոր նախաձեռնության շրջանակներում ներկայացնում է տեղեկություններ ՀՀ համայնքներում տիրող իրավիճակի և համայնքում անցկացվող կանխարգելիչ միջոցառումների մասին: Ներկայացնում ենք, թե ինչ կանխարգելիչ ախտահանման աշխատանքներ են իրականացվում ՀՀ Լոռու մարզի Տաշիր համայնքում:

Մանրամասներ ներկայացրեց ՀՀ Լոռու մարզի Տաշիր համայնքի ղեկավար Էդգար Արշակյանը:

-Այս օրերին ինչպե՞ս է ընթանում համայնքային կյանքը Տաշիր համայնքում:

-Ինչպես և ողջ հանրապետությունում, այնպես էլ Տաշիր համայնքում արտակարգ իրավիճակի պայմաններում կյանքն իր բնականոն ընթացքով չի ընթանում։ Փողոցները գրեթե դատարկ են, բնակիչները, ցուցաբերելով սոցիալական բարձր գիտակցություն, տնից դուրս են գալիս միայն հույժ անհրաժեշտության դեպքում. մեծ է ոստիկանության կողմից վերահսկողությունը։       

-Համայնքում ի՞նչ միջոցառումներ են իրականացվում կորոնավիրուսի կանխարգելման համար: Արդյոք գլխավոր փողոցներից բացի ախտահանվո՞ւմ են նաև երկրորդական և երրորդական փողոցները:

-Ամեն օր համայնքապետարանի քաղաքային տնտեսությունը սպասարկող հիմնարկի աշխատակիցների կողմից ախտահանվել և ախտահանվում են  համայնքի բոլոր հիմնարկությունները, բազմաբնակարան շենքերի շքամուտքերն ու ճաղավանդակները, հասարակական վայրերը, զբոսայգիներն ու հանրային տարածքները, փողոցներն ու մայթերը։ Ախտահանումն իրականացվում է թաղամաս առ թաղամաս, և, իհարկե, երկրորդական փողոցները ևս անմասն չեն մնում։ 

-Կա՞ մի միջոցառում, որն այս օրերին իրականացվում է միայն Տաշիր համայնքում. նկատի ունենք ախտահանման և կանխարգելիչ միջոցառումները:

-Կարծեմ՝ չկան, բայց մեր փոքր համայնքի ներսում անգամ բնակավայրերի սահմանային կետերում սահմանել ենք անցակետեր,    որտեղ  վերահսկողություն է սահմանված բնակավայրից բնակավայր շարժվող մեքենաների և ուղևորների նկատմամբ, որպեսզի նվազագույնի հասցնենք մարդկային շփումներն ու վարակման ռիսկերը։

-Ի՞նչ ռեժիմով է աշխատում համայնքապետարանը արտակարգ դրության պայմաններում:

-Տաշիրի համայնքապետարանն արտակարգ դրության առաջին օրերից անցել է սահմանափակված ռեժիմով աշխատանքի, իսկ արդեն մինչև ապրիլի 1-ը աշխատում ենք փոքր թվով անձնակազմով: Համայնքապետարանն իր գործունեությունն իրականացնելու է հեռավար`առցանց եղանակով։ Քաղաքացիներին իրազեկվել է, որ դիմուներն ու առաջարկությունները կարող են ուղարկել  առցանց tashircity.am պաշտոնական կայքէջին:

-Համայնքն այս պահին հատկապես ո՞ր հարցում օգնության կարիք ունի:

-Դեռ փորձում ենք սեփական միջոցներով կազմակերպել կանխարգելման աշխատանքները, իսկ վերահսկումը համայնքը չէ իրականացնում:

-Ձեր գնահատմամբ՝ համայնքներն այսօր պատրա՞ստ են դիմակայել կորոնավիրուսին:

-Իհարկե, պետական և տեղական իշխանությունների համատեղ աշխատանքի, հասարակության քաղաքացիական բարձր պատասխանատվության, գիտակցության և ինքնակազմակերպման շնորհիվ կարելի է կանխարգելել, իսկ հարկ եղած դեպքում  նաև դիմակայել համաճարակին: