Եվրոպական հանձնաժողովի «Քաղաքապետերի դաշնագիր՝ Արևելք» ծրագրի շրջանակներում Հայաստանի համայնքների միության կողմից Դաշնագրին անդամակցող և առաջընթաց գրանցող համայնքների մասնագետների համար Երևանում կազմակերպվել է «Կայուն զարգացման տեղական հավակնությունների վերածումը գործողությունների՝ հայեցակարգերի և ծրագրային առաջարկների մշակման հմտությունների բարելավման միջոցով» խորագրով երրորդ ուսուցողական սեմինարը։

Սեմինարին մասնակցել են Դաշնագրին անդամակցող համայնքների տասնյակ ներկայացուցիչներ։ Սեմինարը «Քաղաքապետերի դաշնագիր՝ Արևելք» ծրագրի շրջանակներում անցկացված երրորդ ուսուցողական միջոցառումն է։ Պարբերաբար կազմակերպվող համապատասխան ոլորտներում կարողությունների ամրապնդման ուսուցողական սեմինարների նպատակն է աջակցել համայնքներին Դաշնագրի ներքո իրենց կողմից ստանձնած հանձնառություններն արդյունավետ և պատշաճ կերպով իրականացման գործում:

Երևանում անցկացված ուսուցողական այս սեմինարը նվիրված էր Դաշնագրի շրջանակներում համայնքների կողմից առաջարկվող կայուն էներգետիկ և կլիմայական զարգացման գործողությունները բանկերի և ֆինանսական կառույցների համար գրավիչ ծրագրային առաջակների վերածելու մոտեցումների ներկայացմանը և քննարկմանը։

Դասընթացը նախատեսված էր համայնքապետարանների այն մասնագետների համար, որոնք անմիջապես ներգրավված են համայնքային զարգացման, ներդրումային ծրագրերի և ծրագրային առաջարկների մշակման և իրականացման գործընթացներում, ինչպես նաև իրազեկ են ԵՄ «Քաղաքապետերի դաշնագիր» նախաձեռնության մասին:

Սեմինարի ընթացքում ողջույնի խոսքում Դաշնագրի ազգային համակարգող ՀՀ Տարածքային կառավարման և ենթակառուցվածքների նախարարության աշխատակազմի Տեղական ինքնակառավարման քաղաքականության վարչության պետ Աշոտ Գիլոյանը կարևորել է այսպիսի սեմինարների անցկացումը և նաև հղում կատարելով կայուն զարգացման նպատակներին, նշել է, «Մեր երկիրն ընդունել և տեղական մակարդակում անցյալ տարեսկզբին փորձել է տեղայնացնել կայուն զարգացման նպատակները, որը ԵԽ Կոնգրեսի հանձնարարականներից էր։ Այսօր մեր երկրում հայմայնքների ֆինանսական հնարավորություններն իրականում թույլ են՝ համեմատած հարևան երկրների հետ, համեմատած Արևելյան գործընկերության երկրների հետ, էլ չեմ ասում՝ արևմտյան Եվրոպայի երկրների հետ։ Բայց կան հնարավորություններ, եթե դուք ձեր գաղափարը խելացի նկարագրեք ու փաթեթավորեք, հղում անեք նաև կայուն զարգացման նպատակներին»։

Դաշնագրի աջակից Հայաստանի համայնքների միության նախագահ Էմին Երիցյանը փաստել է՝ կարողությունների զարգացումը եղել և մնում է մեր համայնքների ամենաթույլ տեղը․ «Ինստիտուցիոնալ բարեփոխումներից, խոշորացումից հետո էլ մեր համայնքների կարողությունները դեռևս շատ թույլ են, մինչդեռ հաջողությունը պայմանավորված է կարողություններով։ Հաջողում են նրանք, որոնք իրենց կարողությունները զարգացնում են։ Ընդհանրապես կյանքում կարողությունների զարգացումն անընդհատ գործընթաց պետք է լինի։ Պատահական չէ, որ «Քաղաքապետերի դաշնագիր՝ արևելք» ծրագրով կարողությունների զարգացումը պարբերաբար կարևորվում է։ Կարողությունների զարգացման թեմային ավելի մոտիվացված պետք է մոտենանք և միշտ որոշակի պաշար մեզ հետ տանենք և փոփոխված դուրս գանք այս սեմինարներից»։

Հայաստանում Ծրագրի փորձագետ Արտեմ Խարազյանն էլ ներկայացրել է Ծրագրով գրանցված առաջընթացը․ «Այս ընթացքում ՄԱԿ-ի զարգացման գրասենյակի աջակցությամբ Ալավերդին իր կայուն զարգացման գործողության ծրագիրը մշակել, ավարտել է, այն պատրաստ է, և պետք է ավագանին հաստատի, ու գրանցենք։ Դա  ամենակարևոր փաստաթուղթն է, որ համայնքները պետք է մշակեն, Գյումրին ԱՄՆ Միջազգային զարգացման գործակալության աջակցությամբ մշակել է այդ գործողությունների ծրագիրը, ավագանին հաստատել է, արդեն գրանցվել, ներկայացվել է հաստատման, Վանաձորը, Սպիտակը, Ստեփանավանը ևս ՄԱԿ-ի գրասենյակի  հետ միասին արդեն սկսել են մշակումը։ Մեր ծրագրի շնորհիվ մենք հնարավորություն ունենք ևս երկու համայնքի աջակցելու»։

Կայուն ֆինանսավորման փորձագետ Լիլիթ Ղարայանը մասնակիցներին ներկայացրել է դրամաշնորհային միջազգային, ազգային և ենթազգային աղբյուրներ, անդրադարձել է այնպիսի թեմաների, ինչպիսիք են ծրագրերի ընտրություն և առաջնահերթության որոշումը, ծրագրային առաջարկների մշակման հիմնական սկզբունքներն և բովանդակությունը։ Գործնական առաջադրանքների միջոցով ներկայացվել են սուբվենցիայի ծրագրային հայտերում արվող բնորոշ սխալները, ծրագրային առաջարկներում արվող հիմնական սխալները։

Սեմինարի գործնական հատվածում միջոցառման մասնակիցներից ձևավորված աշխատանքային խմբերի աշխատանքի միջոցով ամրապնդվել են ստացված գիտելիքները՝ կատարելով առաջարկների մշակման գործնական վարժություն։