Փետրվարի 28-ին Երևանում տեղի ունեցավ Հայաստանում տեղական ինքնակառավարման և ապակենտրոնացման վիճակի վերաբերյալ տարեկան զեկույցի շնորհանդեսը:

Հայաստանի համայնքների միության կողմից առաջին անգամ պատրաստված Հայաստանում տեղական ինքնակառավարման ապակենտրոնացման վիճակի վերաբերյալ զեկույցը կազմվել է Միության փորձագետների հետ համագործակցաբար: Միջոցառման ընթացքում այն առաջին անգամ հանրայնացվեց: Զեկույցի հրապարակումը կդառնա ամենամյա: Հայաստանի համայնքների միությունն այսուհետ ամեն տարեվերջին կհրապարակի ՀՀ-ում ապակենտրոնացման վիճակի վերաբերյալ զեկույց:

Փաստաթուղթը պարունակում է տեղեկատվություն տեղական ինքնակառավարման ոլորտում գոյություն ունեցող առկա վիճակի, խնդիրների մասին, կան նաև առաջարկություններ խնդիրների լուծման և հաղթահարման համար:

Փաստաթղթում ներառված մտահոգություններից է այն, որ վարչատարածքային ռեֆորմի արդյունքում համայնքների ՏԻՄ-երին վերապահվեցին բազմաթիվ լիազորություններ, որոնց իրականացման համար պետությունը չապահովեց համապատասխան ֆինանսական աղբյուրներով: Բայց կան պատվիրակված մի շարք լիազորություններ, որոնց մասով համայնքներին ֆինանսավորում չի տրամադրվում, սակայն, փաստացի, համայնքները դրանք իրականացնում են:

Զեկույցի ներկայացումից հետո տեղի ունեցավ հանրային քննարկում: Համայնքի ղեկավարներ, ավագանու անդամներ, քաղաքական տարբեր ուժերի, քաղաքացիական հասարակության ներկայացուցիչներ իրենց կարծիքը հայտնեցին Հայաստանում ապակենտրոնացման վիճակի վերաբերյալ: Մասնակիցները ներկայացրին իրենց առաջարկություններն ու դիտարկումները: