Ինչպե՞ս է արտակարգ դրության օրերին անցնում համայնքային կյանքը ՀՀ Գեղարքունիքի մարզի Սարուխան համայնքում, համանքապետարանն ի՞նչ կանխարգելիչ աշխատանքներ է իրականացնում ընդդեմ կորոնավիրուսի, որքանո՞վ են համայնքի բնակիչները պահպանում ինքնամեկուսացման կանոնները:

Հայաստանի համանքների միության «Համայնքներն արտակարգ դրության ժամանակ» խորագրով նոր նախաձեռնության շրջանակներում զրուցեցինք Սարուխան համայնքի ղեկավար Լյովա Աբրահամյանի հետ:

-Այս օրերին ինչպե՞ս է ընթանում համայնքային կյանքը Սարուխան համայնքում:

-Համայնքում չեն գործում հասարակական օբյեկտները՝ բացառությամբ մթերային խանութների եւ դեղատների։ Բնակիչների տեղաշարժը հնարավորինս սահմանափակված է: Համայնքում միջոցառումներ չեն անցկացվում. հուղարկավորությունները կատարվում են քիչ թվով մարդկանցով:

-Ինչպե՞ս են բնակիչները պահպանում ինքնամեկուսացման կանոնները:

-Բնակչությունն ըմբռնումով է մոտենում կառավարության եւ պարետի որոշումներին եւ տնից դուրս է գալիս խիստ անհրաժեշտության պարագայում։

-Համայնքում ի՞նչ միջոցառումներ են իրականացվում կորոնավիրուսի կանխարգելման համար:

-Համայնքում ամենօրյա ռեժիմով իրականացվում են ախտահանման աշխատանքներ: Ախտահանվում են փողոցները, հասարակական վայրերը եւ օբյեկտները։ Համայնքապետարանի աշխատակիցների կողմից իրականացվում է հսկողություն համայնքի մուտքերի եւ ելքերի վրա։ Սերտ համագործակցում ենք բուժամբուլատորիայի հետ։

-Համայնքն այս պահին հատկապես ո՞ր հարցում օգնության կարիք ունի:

-Համայնքում կա ախտահանիչ միջոցների, դիմակների, ձեռնոցների պակաս։

-Ձեր գնահատմամբ՝ համայնքներն այսօր պատրա՞ստ են դիմակայել կորոնավիրուսին:

-Ցավոք սրտի COVID-19 պանդեմիան մարդկության համար այս պահին անհաղթահարելի է: Մեզ մնում է հուսալ, որ երկիր մոլորակը հաղթանակած դուրս կգա այս իրավիճակից: