Հայաստանի համայնքների միության նոր նախաձեռնության շրջանակներում «Համայնքներն արտակարգ դրության ժամանակ» խորագրի ներքո ներկայացնում ենք, թե այժմ ինչ իրավիճակ է տիրում Արտաշատ քաղաքում:

Մանրամասներ է ներկայացնում Արտաշատ համայնքի ղեկավար Կարեն Բենիամինյանը:

-Համայնքում ի՞նչ միջոցառումներ են իրականացվում կորոնավիրուսի կանխարգելման համար:

 -Այս պահին ակտիվ ընթանում են  ախտահանման աշխատանքներ: Արտաշատի փողոցներում կատարվող քլորաջրով մաքրման աշխատանքներին զուգահեռ՝  արդեն երկրորդ օրն է ախտահանման աշխատանքներ են մեկնարկել նաև բազմաբնակարան շենքերի տարածքներում՝ մաքրվում են շքամուտքերը, աստիճանավանդակները: Ախտահանման աշխատանքներ են ընթանում նաև քաղաքային կանգառների տարածքներում և բոլոր այն հնարավոր վայրերում, որտեղ եղել են մարդկային կուտակումներ: Քլորաջրով մաքրվում են քաղաքում տեղադրված աղբարկղերը և դրանց հարակից տարածքները:

Աշխատանքները կրելու են շարունակական բնույթ և գտնվում են իմ անմիջական վերահսկողության ներքո:

Նաև ժամանակավորապես չեն գործում համայնքային ենթակայության նախադպրոցական և արտադպրոցական կրթական ու մշակութային կազմակերպությունները:  Հետաձգվել են նախատեսված  բոլոր հանրային  միջոցառումները:

-Այս օրերին ինչպե՞ս է ընթանում համայնքային կյանքը :

- Համայնքային կյանքը  Արտաշատում այս օրերին մի փոքր  պասիվ է: Մարդիկ մեծամասամբ պահպանում են տրված՝ տանից միայն խիստ անհրաժեշտության դեպքում դուրս գալու  ցուցումները:  Համայնքում ստեղծվել է  արտակարգ իրավիճակներին արձագանքող մասնագիտական թիմ,  որը ղեկավարում  եմ ես, իրականացվել են իրազեկման և կանխարգելիչ մի շարք գործողություններ:

-Ի՞նչ ռեժիմով է աշխատում համայնքապետարանը արտակարգ դրության պայմաններում:

-Աշխատում ենք  մեր սովորական ռեժիմով, միայն վարակի  հնարավոր տարածումը կանխարգելելու  նպատակով  սահմանափակվել է բնակիչների մուտքը համայնքապետարան:   Կազմակերպվել է դիմումների, գրությունների  առցանց ընդունում և պատասխանում, ակտիվ գործում է համայնքապետարանի ֆեյսբուքյան էջը՝ պատասխանելով մեր համաքաղաքացիների հարցերին, տրվում է անհրաժեշտ ինֆորմացիա՝ գույքահարկի պարտավորությունները ճշտելու և համապատասխան տեղեկանքները ստանալու մասին:  Նաև կատարվում են  վարակի կանխագելման   նպատակով  կատարվող իրազեկման  աշխատանքներ:

Նշեմ նաև, որ արդեն այսօր կորոնավիրուսի դեմ պայքարի աշխատանքներին աջակցելու և օգնելու նպատակով աշխատանքային խումբ ենք ստեղծել, որը կամավորների միջոցով կկազմակերպի համայնքային մանկապարտեզներում պահեստավորված պարենային և ոչ պարենային մթերքների բաշխումը՝ համայնքի սոցիալապես անապահով ընտանիքներին: Աշխատանքները համակարգում է Արարատի մարզպետարանը: Շնորհակալություն եմ հատնում բոլոր այն կամավորներին, ովքեր շատ օպերատիվ արձագանքեցին և ներգրավվեցին աշխատանքներում:

-Համայնքում գործո՞ւմ է արդյոք թեժ գիծ, որով համայնքի բնակիչները կարող են կորոնավիրուսին և առողջական խնդիրներին առնչվող իրենց հարցերի մասին տեղեկատվություն ստանալ:

-Այո, մենք մեր բնակիչներին տրամադրել ենք մեր թեժ գծի հեռախոսահամարը՝ /0235/02-55-49, մեզ կարող են զանգահարել և ստանալ իրենց հուզող հարցերի պատասխաննրը:

-Համայնքն այս պահին հատկապես ո՞ր հարցում օգնության կարիք ունի:

-Այս պահին ոչնչի կարիք չունենք, ակտիվ կապի մեջ ենք մարզպետարանի հետ և հարկ եղած դեպքում դիմում ենք: