«Կարևոր է տեղական և տարածքային իշխանությունների ընտրված ներկայացուցիչներին տրամադրել անհրաժեշտ աջակցություն, որպեսզի նրանք կարողանան իրագործել իրենց ամենօրյա առաքելությունը՝ դիմակայելով ամենօրյա մարտահրավերներին և ճգնաժամային իրավիճակներին»,- հայտարարել է ԵԽ Կոնգրեսի տեղական իշխանությունների պալատի նախագահ պարոն Բերն Վոհրինգերը՝ ելույթ ունենալով «Նշելով տեղական ինքնակառավարումը» սեմինարի ընթացքում:

Բերն Վոհրինգերը ելույթ է ունեցել «Տեղական ինքնակառավարում՝ առաջատարը մարտահրավերների ժամանակ» թեմայով: ԵԽ Կոնգրեսի տեղական իշխանությունների պալատի նախագահը շեշտել է, որ բազմամակարդակ կառավարման, կայուն և ուժեղ հասարակություն ունենալու բանալին գործունակ տեղական ժողովրդավարությունն է, որը պետք է ներկայացվի ուժեղ տեղական իշխանությամբ և ուժեղ համակարգերով՝ կառավարման բոլոր մակարդակներում: Նա նշել է. «Այս օրերին ժողովրդավարական հասարակությունները լուրջ մարտահրավերների առաջ են կանգնած: Տեղական և տարածքային իշխանություններն են, որ կանգնած են առաջնագծում՝ արձագանքելով քաղաքացիների ամենօրյա կարիքներին, սպասելիքներին բոլոր իրավիճակներում»: Նա վստահեցրել է, որ Կոսնգրեսն աջակցում է տեղական իշխանություններին. «Կոնգրեսը տեղական իշխանությունների և նրանց շահերը պաշտպանող ասոցիացիաների կողքին է և ակնկալում է արդյունավետ փոխգործակցություն: Այս առումով լավ օրինակ է Cities4Cities հարթակը, որը Կոնգրեսի կողմից է ստեղծվել, որպեսզի քաղաքները կարողանան միմյանց օգնել»: