Երևանի քաղաքապետ, Հայաստանի համայնքների միության նախագահ Տիգրան Ավինյանը Տոկիոյի քաղաքապետի հրավերով մասնակցում է տարածաշրջանի քաղաքային նորարարության և տեխնոլոգիաների ոլորտում առաջատար G-NETS / SusHi Tech Tokyo 2026 միջոցառմանը։

Ապրիլի 27–29-ը Տոկիոյում անցկացվող G-NETS առաջնորդների 3-րդ գագաթնաժողովը համախմբել է աշխարհի հինգ մայրցամաքներից 49 քաղաքների ղեկավարների՝ ձևավորելու համագործակցության հարթակ ժամանակակից քաղաքների առջև ծառացած մարտահրավերներին համատեղ լուծումներ գտնելու նպատակով։ Գագաթնաժողովի հիմնական թեման է «Նոր քաղաքային ապագա՝ կառուցված կլիմայական և աղետների դիմակայունության հիման վրա», որի շրջանակում քննարկվում են ինչպես կլիմայի փոփոխության հետևանքների հաղթահարման, այնպես էլ քաղաքացիների բարեկեցության բարձրացման ուղիները։ G-NETS-ը (Global City Network for Sustainability) Տոկիոյի նախաձեռնությամբ ստեղծված միջազգային հարթակ է, որի նպատակն է միավորել աշխարհի քաղաքները՝ նորարարությունների միջոցով կայուն զարգացման մոդելներ ձևավորելու համար։ Գագաթնաժողովի ընթացքում քաղաքապետերն ու մարզպետները մասնակցում են թեմատիկ քննարկումների, ներկայացնում իրենց քաղաքներում իրականացված հաջողված փորձը և համատեղ ձևակերպում հետագա համագործակցության ուղղությունները, որոնք ամփոփվում են համատեղ հայտարարությամբ։ Միջոցառումը անցկացվում է SusHi Tech Tokyo 2026-ի շրջանակում, որը ներառում է նաև խոշոր ստարտափ համաժողովներ, տեխնոլոգիական ցուցադրություններ և հանրային միջոցառումներ՝ նվիրված ապագայի քաղաքների լուծումներին։ Այն միավորում է քաղաքային ղեկավարներին, քաղաքականություն մշակողներին և ոլորտի փորձագետներին՝ խթանելով կոնկրետ քայլեր քաղաքաշինության և տեխնոլոգիական զարգացման ուղղությամբ։