Եվրոպայի խորհրդի Տեղական և տարածքային իշխանությունների կոնգրեսի (ԵԽ Կոնգրես) նախագահի հրավերով սեպտեմբերի 23-ին Նիդերլանդների Ֆլևոլանդ մարզի Լելիստադ քաղաքում տեղի է ունեցել ԵԽ Կոնգրեսի Բյուրոյի նիստը։

Կոնգրեսի Բյուրոյի նիստին մասնակցել է Հայաստանի համայնքների միության նախագահ, ԵԽ կոնգրեսում հայկական պատվիրակության ղեկավար Էմին Երիցյանը։

Բյուրոն շարունակել է քննարկումները Ուկրաինայում  պատերազմի հետ կապված։ Կոնգրեսի անդամներին կոչ է արվել օգտագործել cities4cities հարթակը, որը ստեղծվել է, որպեսզի համայնքներն այս հարթակի միջոցով կարողանան միմյանց աջակցություն ցուցաբերել։

Բյուրոն քննարկել է նաև տեղական ժողովրդավարության հետ կապված իրավիճակը Թուրքիայում, որտեղ ընդդիմադիր քաղաքական գործիչները, այդ թվում Կոնգրեսի նախկին անդամներ, գտնվում են երկարաժամկետ ազատազրկման մեջ։

Բյուրոն նաև քննարկել է առաջիկայում Բոսնիայում և Հերցեգովինայում համապատասխանաբար հոկտեմբերի 2-ին և նոյեմբերի 20-ին կայանալիք ՏԻՄ ընտրությունների հետ կապված հարցեր, որոնց դիտորդական առաքելություն կիրականացնի Կոնգրեսի պատվիրակությունը։