Ստրասբուրգում մարտի 22-24-ն անցկացվող Եվրոպայի խորհրդի Տեղական և տարածքային իշխանությունների կոնգրեսի (ԵԽ Կոնգրես) 42-րդ նստաշրջանի ժամանակ իր ելույթում ԵԽ Կոնգրեսի  նախագահ Լինդերտ Վերբիկը հայտարարել է՝ Ռուսաստանի կողմից Ուկրաինայի տարածքային ամբողջականությանն ուղղված ագրեսիան ցույց տվեց, որ ժողովրդավարական արժեքների պաշտպանության հարցում մենք միասնական ենք:

Կոնգրեսի նախագահը կարևորել է հատկապես լարված իրավիճակներում տեղական իշխանությունների դերակատարությունը, որոնք առաջնագծում են: Նա նշել է, որ կայուն հասարակության կառուցումը սկսվում է տեղական մակարդակից՝ քաղաքներից ու ռեգիոններից:

Լինդերտ Վերբիկը հույս է հայտնել, որ Ռուսաստանը վերջ կդնի այս ամենին և նոր երկաթե վարագույր չի բացի Եվրոպայի հետ:

ԵԽ Կոնգրեսի նախագահը նկատել է՝ Ուկրաինայի դեմ պատերազմն ընդգծել է ուժեղ տեղական իշխանություններ ունենալու կարևորությունը ու դատապարտել է Ուկրաինայի տեղական իշխանությունների ներկայացուցիչների նկատմամբ կատարվողը. «Ես խստորեն դատապարտում եմ Զապորոժիեի շրջանի Մելիտոպոլիի և Դնեպրուդնիի քաղաքապետերի առևանգումը և ճնշումը օկուպացված տարածքներում տեղական ընտրված ներկայացուցիչների վրա և կոչ եմ անում անհապաղ ազատ արձակել նրանց: Ես հարգանքի տուրք եմ մատուցում տեղական ղեկավարներին իրենց քաղաքների, ավանների և գյուղերի քաղաքացիների ամենօրյա մարտահրավերներին դիմակայելու գործում նրանց առանցքային դերի համար: Ես կոչ եմ անում Ռուսաստանի իշխանություններին անհապաղ դադարեցնել ռազմական գործողությունները»: