«Խտրականության կանխարգելումը մեր աշխատանքի հիմնարար սկզբունքներից մեկն է, և այս տեսանելիության օրերը նվիրված են մեր արժեքներն ավելի լավ փոխանցելուն»,- հայտարարել է Եվրոպայի խորհրդի (ԵԽ) Տեղական և տարածքային իշխանությունների կոնգրեսի տնօրեն Ռաֆայել Բենիտեսը «Հակախտրական հաղորդակցություն՝ պաշտպանել բազմազանությունը և խթանել ներառականությունը տեղական մակարդակում» թեմայով աշխատաժողովում։

Միջոցառումը տեղի է ունեցել ապրիլի 27-ին՝ Թելավիում։ Այդ օրը՝ 1999-ին Վրաստանը դարձավ ԵԽ անդամ։ Այս մասին միջոցառման ընթացքում հիշեցրել է Վրաստանում ԵԽ գրասենյակի ղեկավար Նատալյա Վուտովան։

Միջոցառումն անցկացվել է Եվրոպայի խորհրդի տեսանելիության օրերի համատեքստում։ Այն համատեղ կազմակերպել են Վրաստանում ԵԽ գրասենյակը, Տեղական իշխանությունների ազգային ասոցիացիան և Վրաստանի արտաքին գործերի նախարարությունը: Միջոցառման բացման արարողության ժամանակ Վրաստանի ԱԳ նախարարի առաջին տեղակալ Լաշա Դարսալիան ընդգծել է Վրաստանում մարդու իրավունքների պաշտպանության ամրապնդման համար ԵԽ-ի հետ համագործակցության կարևորությունը, ինչպես նաև այդ համագործակցությունը Վրաստանի համար 2024-2027 թվականների Գործողությունների նոր ծրագրի մշակման միջոցով:

Աշխատաժողովը, որին մասնակցում էին ավելի քան 60 մասնակիցներ, նվիրված էր տեղական իշխանությունների միջև ներառական հաղորդակցման հմտությունների զարգացմանը՝ խոցելի խմբերի կարիքների ապահովմանը և իրազեկության բարձրացման արդյունավետ գործունեություն ծավալելուն։ Ամրապնդվել են այնպիսի հիմնական կարողություններ, ինչպիսիք են ակտիվ լսելը, բազմազանության նկատմամբ զգայունությունը և արդյունավետ հաղորդակցությունը, որպեսզի տեղական իշխանություններին հնարավորություն ընձեռվի մշակել ռազմավարություններ՝ վստահություն ստեղծելու իրենց առավել խոցելի համայնքների հետ: Տեղական իշխանություններին նաև աջակցություն է տրվել վերանայել իրենց հաղորդակցման ծրագրերը, որպեսզի ավելի հավաստիորեն արտացոլեն խոցելի խմբերի պատկերն ու կարիքները՝ այդպիսով պայքարելով խտրականության դեմ և նպաստելով իրենց համայնքներում այդ խմբերի ներառմանը: