ԿԸՀ-ն ամփոփել է նոյեմբերի 14-ին տեղի ունեցած տեղական  ինքնակառավարման մարմինների ընտրությունների (ՏԻՄ) նախնական տվյալները:

Նոյեմբերի 14-ին ՏԻՄ ընտրություններ անցկացվեցին ՀՀ Սյունիքի մարզի Կապան, ՀՀ Տավուշի մարզի Իջևան, ՀՀ Լոռու մարզի Ստեփանավան և Լերմոնտովո, ՀՀ Կոտայքի մարզի Արզնի համայնքներում:

Արզնի և Լերմոնտովո համայնքներում ՏԻՄ ընտրություններն անցկացվեցին մեծամասնական ընտրակարգով, իսկ նշված մյուս համայնքներում ընտրություններն անցկացվեցին համամասնական ընտրակարգով:

Ըստ ԿԸՀ նախնական տվյալների՝ Ստեփանավանում հաղթող է ճանաչվել «Քաղաքացիական պայմանագիր» կուսակցությունը՝ ստանալով 4004 ձայն: «Բարգավաճ Հայաստան» կուսակցություն՝ 705 ձայն, «Հայ ազգային կոնգրես»՝ 218: Ընտրողների ընդհանուր թիվը՝ 13 343, քվեարկության մասնակիցների ընդհանուր թիվը՝ 5 107,  անվավեր քվեաթերթիկների թիվը՝ 180: Իջևանում ևս հաղթել է «Քաղաքացիական պայմանագիր»-ը՝ 80.78%, «Հայ հեղափոխական դաշնակցություն»-ը՝ 15.87%, անվավեր- 3.35%:

Կապանում 13 962 ձայնով հաղթել է «Շանթ դաշինք» ազգայնական կուսակցությունը: «Քաղաքացիական պայմանագիրն» ստացել է 5791 ձայն: Ընտրողների ընդհանուր թիվը՝ 31 673, քվեարկության մասնակիցների ընդհանուր թիվը՝ 20 087, անվավեր քվեաթերթիկների թիվը՝ 331: 

Արզնի համայնքում ավագանու անդամի մեծամասնական ընտրակարգով անցկացված ընտրությունների արդյունքներով՝ հաղթել է անկուսակցական Արտաշես Լալայանը՝ 116 ձայն:

Լերմոնտովո համայնքում ավագանու անդամի ընտրություններում առաջատար է Վասիլի Կորոլյովը՝ 46 ձայն, իսկ համայնքի ղեկավարի ընտրություններում 167 ձայնով հաղթել է Լերմոնտովո համայնքի գործող ղեկավար Էդիկ Չախալյանը: