2007թ.-ից ի վեր Եվրոպայի խորհրդի Կոնգրեսը ԵԽ 47 անդամ երկրների տեղական և ռեգիոնալ իշխանություններին հրավիրում է մասնակցելու «Տեղական ժողովրդավարության եվրոպական շաբաթին» (ELDW), որը անց է կացվում ամեն տարի հոկտեմբերի 15-ին:

«Սա միջոց է՝ Եվրոպայի բոլոր քաղաքացիներին հասնելու, նրանց ամենամոտ մակարդակներում ներգրավելու համար,- նշում է Կոնգրեսի նախագահ Ժան-Կլոդ Ֆրեկոնը,-մասնակցելով ELDW-ի շրջանակներում կազմակերպված տեղական միջոցառումներին՝ քաղաքացիները տարածում, խթանում են մեզ համար  ընդհանուր տեղական ժողովրդավարության արժեքները և սկզբունքները: Դրանք ներառում են, մասնավորապես,  Տեղական ինքնակառավարման եվրոպական խարտիայով և վերջինիս լրացուցիչ արձանագրությամբ սահմանված սկզբունքներն ու արժեքները»: Յուրաքանչյուր տարի Ժողովրդավարության շաբաթը թիրախում է առանձին թեմա: 2016թ.-ի թեման է՝ «Համակեցություն մշակութապես տարբեր հասարակություններում. հարգանք, երկխոսություն, փոխգործակցություն»:  Տեղական իշխանությունները, անշուշտ, կենտրոնական դերակատարում ունեն ժամանակակից, ներառող հասարակությունների առջև ծառացած մարտահրավերների հաղթահարման հարցում: Այս տարի դուք ավելի մեծ հնարավորություն կունենաք տարածելու Ձեր փորձը սոցիալական լրատվամիջոցների հարթակներում՝ Facebook-ում և Twitter-ում՝ օգտագործելով #eldw2016 հեշթեգը: