Եվրոպայի խորհրդի տեղական և տարածքային իշխանությունների կոնգրեսի 43-րդ նստաշրջանի ընթացքում քննարկվել է կառավարման դանիական փորձը: Ներկայացվել է Կոնգրեսի պատրաստած զեկույցը: 

Ըստ այդմ՝ Դանիայի կառավարման համակարգը Եվրոպայի տարածքում ամենաապակենտրոնացվածներից մեկն է:

Զեկույցում կարևորվում է քաղաքապետարանների պատասխանատվության լայն շրջանակը և նրանց դերը Դանիայի բարեկեցության համակարգում և կենտրոնական կառավարության ու տեղական իշխանությունների միջև խորհրդակցության և համագործակցության մշակույթը:

Զեկուցողներ Խավիեր Կադորեն (Ֆրանսիա) և Կարլա Դեժոնյեն (Բելգիա) հայտարարել են, որ Դանիան այս առումով մեծ փորձ ունի: Բայց նաև զեկուցողները փաստել են, որ Դանիան դեռ չի ստորագրել Տեղական ինքնակառավարման եվրոպական խարտիայի լրացուցիչ արձանագրությունը: Նրանք Դանիայի իշխանություններին կոչ են արել ստորագրել այդ արձանագրությունը: 2007-ին լայնածավալ վարչատարածքային բարեփոխումներից 15 տարի անց Դանիայի տեղական ինքնակառավարման համակարգն այժմ բախվում է լւրջ մարտահրավերների: Զեկուցողները նշում են, որ մարզերի և համայնքների միջև իրավասությունների բաշխումն առողջապահական ծառայությունների մատուցման հարցում դարձել է ավելի ու ավելի դժվար վերջին տարիներին, և յադ հարցը պահանջում է հատուկ ուշադրություն կառավարության բոլոր մակարդակների կողմից:

Կոնգրեսը խորհուրդ է տալիս Դանիային վերանայել համագործակցության շրջանակը և համայնքների և համայնքների միջև առողջապահական ծառայությունների մատուցման վերաբերյալ խնդիրների բաշխումը` խորհրդակցելով տեղական և տարածաշրջանային իշխանությունների ասոցիացիաների հետ` նպատակ ունենալով բարելավել համագործակցությունը և բարձրացնել առողջապահական համակարգի կայունությունը: