Սպառնալիքներն ու հարձակումները տեղական իշխանությունների ներկայացուցիչների նկատմամբ ավելի ու ավելի հաճախակի են դառնում: Ապրիլի 3-ին Եվրոպայի խորհրդրի տեղական և տարածքային իշխանությունների կոնգրեսի պալատի կողմից կազմակերպված «Քաղաքապետերը՝ ճնշման ներքո» խորագրով քննարկմանն այս թեմայով իրենց մտահոգությունները հայտնեցին Գդանսկի, Ալտենայի և Հարլեմի քաղաքապետերը:

Հիշեցնենք՝ ապրիլի 2-ին Ստրասբուրգում մեկնարկեց Եվրոպայի խորհրդի Տեղական և տարածքային իշխանությունների կոնգրեսի 36-րդ նստաշրջանը: Կոնգրեսի աշխատանքներին մասնակցում է հայկական պատվիրակությունը՝ Հայաստանի համայնքների միության նախագահ Էմին Երիցյանի գլխավորությամբ: Նստաշրջանն անցկացվում է «Քաղաքապետերը՝ ժողովրդավարության երաշխավոր» խորագրով:

Ալեքսանդրա Դուլկևիչն իր ուղերձում՝ ուղղված ԵԽ Տեղական և տարածքային իշխանությունների Կոնգրեսի պալատին, ասաց. «Քաղաքացիների ներգրավվածությունը ուժի կիրառման հարցում ամենաարդյունավետ միջոցն է նրանց կրթել ժողովրդավարական սկզբունքներով»:

Գդանսկի ընտրված քաղաքապետը, հիշեցնելով Գդանսկի նախկին քաղաքապետի սպանությունը, իր գործընկերներին զգուշացրեց պոպուլիստական քաղաքականության՝ տեղական ժողովրդավարությանը սպառնող վտանգների մասին: Միայն այն քաղաքացիները, որոնք ազատ են, պատասխանատու են և գիտեն իրենց իրավունքներն ու պարտականությունները, մինայն այդ դեպքում կարելի է պայքարել քարոզչության դեմ:

Ըստ նրա՝ այսուհետև Գդանսկի քաղաքապետարանի քաղաքականությունն այն է լինելու, որ քաջալերի քաղաքացիներին, որպեսզի ներգրավվեն քաղաքի կառավարման գործընթացներում:

Գերմանիայի Ալտենա քաղաքի քաղաքապետ Անդրեաս Հոլսթեյնը մտահոգություն հայտնեց, որ ոչ միայն պակասում է հարգանքը համայնքի ղեկավարների, այլև ընտրված պաշտոնյաների նկատմամբ, անգամ համայնքային հրշեջների: Նա հայտարարեց. «Գերմանիայի քաղաքապետերի 50 տոկոսից ավելին սպառնալիքների է ենթարկվել տարբեր ձևերով»: Ըստ նրա՝ հաջողության հասնելու և այս խնդիրները հարթելու միակ ճանապարհը լսել քաղաքացիների ձայնը և վստահություն կառուցել:

Խոսելով իր փորձի մասին՝ Հարլեմի (Նիդերլանդներ) քաղաքապետ Ջո Վինեն ևս հաստատեց, որ քաղաքապետերի նկատմամբ սպառնալիքները մեծանում են, նույնիսկ իրենց երկրում, որտեղ քաղաքապետերը սովոր են հեծանիվով ման գալ:

Քննարկման ընթացքում իրենց սեփական վկայությունները ներկայացնելով՝ պատվիրակները շեշտեցին այս խնդիրները Կոնգրեսի աշխատանքների օրակարգում պահելու անհրաժեշտության հարցը: Քննարկումից հետո նախաձեռնություն եղավ ձևավորել աշխատանքային խումբ, որը թեմատիկ զեկույցներ կպատրաստի 47 անդամ երկրների մասին: