Ֆրանսիան ներկայացնող Մաթյու Մորին Եվրոպայի խորհրդի տեղական և տարածքային իշխանությունների կոնգրեսի (ԵԽ Կոնգրես) 43-րդ նստարջանի ընթացքում ընտրվել է ԵԽ Կոնգրեսի գլխավոր քարտուղար: Նա կպաշտոնավարի 5 տարի ժամկետով:

Իր ելույթում նա մասնավորապես ընդգծել է Եվրոպայում առկա աննախադեպ իրավիճակը, ՌԴ ագրեսիան ընդդեմ Ուկրաինայի: Այնուհետև նշել է. «Եվրոպայում նոր իմպերիալիզմի ի հայտ գալը կենսական վտանգ է ներկայացնում Ուկրաինայի և մեր յուրաքանչյուր ժողովրդավար երկրի համար»:

ԵԽ Կոնգրեսի նորընտիր գլխավոր քարտուղարը խոստացել է շարունակել երկխոսությունը հանուն խաղաղ Եվրոպայի։ Մաթյու Մորին նաև հիշեցրել է եվրոպական հասարակությունների առջև ծառացած տեղական և տարածաշրջանային խնդիրների բազմազանությունը, որոնք բոլորն էլ Կոնգրեսի գործողությունների ոլորտներն են: Ու հայտարարել է. «Շատ երկրներ մեծ ակնկալիքներ ունեն Կոնգրեսից, և մեզ անհրաժեշտ կլինի ավելի արդյունավետ վարչակազմ՝ դիմակայելու մեր առաջ դրված պատմական մարտահրավերներին»:

Կոնգրեսի նոր գլխավոր քարտուղարի մանդատը ուժի մեջ կմտնի 2023 թվականի հունվարից։