«Ի սկզբանե նպատակ ունենալով աջակցել երիտասարդներին, երիտասարդական կազմակերպություններին և տեղական իշխանություններին, խթանելու երիտասարդների մասնակցությունը տեղական և տարածաշրջանային կյանքում ամբողջ Եվրոպայում՝ Երիտասարդների մասնակցության եվրոպական խարտիան այժմ ավելի արդիական է, քան երբևէ», - հայտարարել է ԵԽ Տեղական և տարածքային իշխանությունների կոնգրեսի (ԵԽ Կոնգրես) երիտասարդության գծով խոսնակի տեղակալ Վերոնիկ Բերթոլը։ 

Նշվում է Երիտասարդների մասնակցության եվրոպական խարտիա 20-ամյակը:

Կոնգրեն արձանագրում է, որ առաջընթաց է նկատվում բազմաթիվ տեղական և տարածաշրջանային իշխանություններում, մասնավորապես, որոշ համայնքներում երիտասարդական խորհրդատվական կառույցների ստեղծման միջոցով: Սակայն նաև կա մտահոգություն, որ 2003թ. մայիսի 21-ին վերանայված Խարտիայի ընդունումից 20 տարի անց երիտասարդության մասնակցությունը լիովին երաշխավորված չէ Եվրոպայում:

Այսօրվա սոցիալ-տնտեսական և բնապահպանական մարտահրավերները ոչ միայն պահանջում են երիտասարդների հետ խորհրդակցություն, այլև պետք է  նրանց հնարավորություն ընձեռել ակտիվորեն ներգրավվել քաղաքական կյանքում, հատկապես բնակչության ծերացման ներկա համատեքստում, որն անխուսափելիորեն ազդում է քաղաքական կազմակերպությունների կազմի վրա:

ԵԽ Կոնգրեսի խոսնակի տեղակալը նշել է․ «Ներկայիս աշխարհում, որը նշանավորվում է պատերազմներով և տարբեր տեսակի ճգնաժամերով, որոնք հաճախ հանգեցնում են ժողովրդավարական հետընթացի և աճող անհավասարության, յուրաքանչյուր քաղաքական որոշում տեւական ազդեցություն է ունենում երիտասարդության համար: Հետևաբար, երիտասարդների մասնակցությունը պետք է լինի կառավարման բոլոր մակարդակների ժողովրդավարական գործընթացների անբաժանելի մասը»։