Ստրասբուրգում հոկտեմբերի 26-28-ն անցկացվող Եվրոպայի խորհրդի Տեղական և տարածքային իշխանությունների կոնգրեսի (ԵԽ Կոնգրես) 41-րդ նստաշրջանի ընթացքում անցկացվել է հետքովիդյան ժամանակահատվածում վերականգնման խնդիրներին նվիրված քննարկում:

Բանավեճի ընթացքում բարձրացվել են եվրոպական քաղաքներում և ռեգիոններում գոյություն ունեցող հրատապ խնդիրները: Օրինակ՝ այն, թե ինչպե՞ս կարող են հասարակությունները վերականգնվել ճգնաժամից հետո, քանի որ առողջապահական իրավիճակը կարծես թե կայունանում է եվրոպական շատ երկրներում:

Կոնգրեսն արձանագրել է՝ քանի որ համաճարակի աճի ժամանակ տեղական և տարածաշրջանային իշխանությունները հայտնվեցին առաջնագծում, նրանց արձագանքները տնտեսական և սոցիալական մարտահրավերներին շարունակում են մնալ վճռորոշ, քանի որ համաճարակը և դրա հետևանքները շարունակվում են: Հետևաբար Covid-19-ից հետո վերականգնման ռազմավարությունները պետք է հարմարեցվեն քաղաքների և ռեգիոնների իրական վիճակին ու ապահովվեն տեղական իշխանությունների հետ խորհրդակցական մեխանիզմները: 

Կարծիքներ են հնչել այն մասին, որ Covid-19-ի ճգնաժամի աշխարհագրությունը բացահայտել է աճող տարածաշրջանային անհավասարություններն առողջության հասանելիության հարցում, նաև բացահայտել է այն, որ այնտեղ, որտեղ կառավարությունների նկատմամբ ավելի քիչ վստահություն կա, պատվաստումների արշավներն ավելի քիչ արդյունավետ էին:

Կոնգրեսն ընդունել է, որ քաղաքներն ու ռեգիոնները հետքովիդյան վերականգնման փուլում կարևոր, անկյունաքարային դերակատարներ են:

Կոնգրեսի անդամներն ընդգծել են՝ անհրաժեշտ է հստակորեն արձագանքել համայնքների պարտականությունների և բյուջեների անհավասարությունների հետ կապված խնդիրներին: