Փետրվարի 12-ին տեղի կունենա Եվրոպայի խորհրդի տեղական և տարածքային իշխանությունների կոնգրեսի (ԵԽ Կոնգրես) Կանոնադրական ֆորումի հեռավար հանդիպումը: 

Կանոնադրական ֆորումի անդամները կքննարկեն «Կոնգրեսի կանոնների և ընթացակարգերի վերանայում. Էթիկական դրույթներ» թեմայով զեկույցը: Այն կներկայացնեն համազեկուցողներ Լիզա Անսալան (Ֆինլանդիա), Հարալդ Սոնդերեգերը (Ավստրիա), Թամար Թալիաշվիլին (Վրաստան):

Հանդիպման ընթացքում հաստատման կներկայացվի Հունգարիայում Տեղական ինքնակառավարման եվրոպական խարտիայի դրույթների իրականացման մոնիտորինգային զեկույցը:

Կանոնադրական ֆորումի ընթացքում հատուկ անդրադարձ կկատարվի նաև տեղական մակարդակում երիտասարդների աշխատանքին, ներգրավվածությանը: Այս թեմայով զեկուցմամբ հանդես կգան համազեկուցողներ Թոմաս Անդերսոնը (Շվեդիա) և Իլսուր Մետչինը (ՌԴ):

Նախատեսված է նաև «Մայրաքաղաքների կարգավիճակը» թեմայով զեկույցի քննարկում:

Կանոնադրական ֆորումը հանդես է գալիս ԵԽ Կոնգրեսի անունից: Կանոնադրական ֆորումի անդամներն են բոլոր ազգային պատվիրակությունների ղեկավարները և Բյուրոյի անդամները: Կոնգրեսի հեռացող նախագահը, հանձնաժողովների նախագահները և քաղաքական խմբերի ղեկավարները ֆորումին մասնակցում են առանց ձայնի իրավունքի: