Ստրասբուրգում մարտի 21-23-ն անցկացված Եվրոպայի խորհրդի տեղական և տարածքային իշխանությունների Կոնգրեսի (ԵԽ կոնգրես) 44-րդ նստաշրջանի ընթացքում Կոնգրեսն ընդունել է առաջարկություններ Բեռլինում տեղի ունեցած տեղական ինքնակառավարման մարմինների ընտրությունների վերաբերյալ։ 

Նշենք, որ Կոնգրեսի 14 հոգանոց պատվիրակությունը դիտորդական առաքելություն է իրականացրել Բեռլինում փետրվարի 12-ին կայացած տեղական ինքնակառավարման մարմինների ընտրությունների ընթացքում։

Կոնգրեսի դիտորդներն այցելել են 80 ընտրական տեղամասեր։

Եվրոպայի խորհրդի տեղական և տարածքային իշխանությունների կոնգրեսի (ԵԽ կոնգրես) խոսնակ Վլադիմիր Պրեբիլիչը հայտարարել է, որ Բեռլինում կայացած տեղական ինքնակառավարման մարմինների ընտրությունները եղել են լավ կազմակերպված և թափանցիկ։

Ընդհանուր առմամբ դրական դիտարկումներին զուգահեռ զեկուղոցը նշել է, որ անհրաժեշտ է միասնականացնել ընտրությունների օրվա ընթացակարգերը, ջանքեր են անհրաժեշտ քարոզարշավի և կուսակցությունների ֆինանսավորման կարգավորող դաշտն ուժեղացնելու, բոլոր թեկնածուների համար թափանցիկություն և հավասար պայմաններ ապահովելու համար: Ըստ զեկուցողի՝ կուսակցական ցուցակներում կանանց համար 40% քվոտա պետք է մտցվի՝ ընտրություններին մասնակցող կանանց թիվը մեծացնելու համար:

Չնայած 2023 թվականին Բեռլինում կայացած ընտրությունների՝ ընդհանուր առմամբ դրական գնահատականին, զեկուցողն առաջարկել է բոլոր ընտրատարածքներում ներդնել քվեարկության օրվա ավելի միասնական չափորոշիչներ, մասնավորապես՝ կապված քվեատուփերի ամրակայուն կնքման, քվեատուփերի ձևավորման, ընտրական նյութերի հանձնման, ինչպես նաև ընտրողների ինքնությունը պարզելու և նրանց ստորագրություններ ձեռք բերելու գործընթացի հետ կապված: Վլադիմիր Պրեբիլիչը նաև հավելել է․ «Ընտրատեղամասերի հասանելիությունը պետք է ապահովվի բոլոր ընտրողների համար՝ անկախ անձամբ քվեարկության այլընտրանքներից»։