Եվրոպայի խորհրդի Նախարարների կոմիտեն երկարացրեց ԵԽ տեղական և տարածքային իշխանությունների կոնգրեսի (Կոնգրես) մանդատը՝ հետևելով Բյուրոյի խնդրանքին: 

Կոնգրեսի պատվիրակությունների թարմացման գործընթացը հետաձգվեց մինչև գարնանային նստաշրջան, որը նախապես նշանակված է 2021 թվականի մարտի 23-25-ը: Սա հնարավորություն կտա Կոնգրեսի անդամներին ավելի երկար ժամանակ ունենալ հայտերի ներկայացման և խորհրդակցությունների համար՝ իրենց ապագա պատվիրակությունների  ձևավորման հարցում:

Կոնգրեսի այն անդամները, որոնք որպես ընտրված տեղական և տարածքային իշխանությունների ներկայացուցիչներ ունեն մանդատ, մինչև 2021 թվականի մարտ ամիս կշարունակեն լինել Կոնգրեսի անդամ, իսկ այն անդամները, որոնք որպես ընտրված պաշտոնյաներ կորցրել են իրենց մանդատը, նրանց կփոխարինեն այլ անդամներ:

Հոկտեմբերին կայանալիք նստաշրջանին Կոնգրեսը կընտրի իր երկու փոխնախագահներին՝ 6 ամիս ժամկետով: Կոնգրեսի քարտուղարությունը պատվիրակների առաջադրման ժամկետների մասին կհայտարարի սեպտեմբերին:

Արդեն մինչև դեկտեմբերի 31-ը պատվիրակությունները, խորհրդակցելով տեղական և տարածքային իշխանությունների, ազգային ասոցիացիաների հետ, կներկայացնեն հաջորդ գումարման Կոնգրեսի պատվիրակությունների անդամների թեկնածություններ: Նաև Կոնգրեսը հորդորում է ազգային ասոցիացիաներին Կոնգրեսի ապագա կազմի ձևավորման ներքին խորհրդակցություններ անցկացնել հենց այս պահից սկսած: