Ստրասբուրգում հոկտեմբերի 26-28-ն անցկացվող Եվրոպայի խորհրդի Տեղական և տարածքային իշխանությունների կոնգրեսի (ԵԽ Կոնգրես) 41-րդ նստաշրջանի ընթացքում Կոնգրեսի օրակարգաին քննարկումների թեմաների շարքում էր նաև կենտրոնական և տեղական իշխանությունների միջև պարտականությունների հստակեցման անհրաժեշտության հարցը:

Այս խնդրի հետ կապված Կոնգրեսը մտահոգություն է հայտնել Ալբանիային նվիրված զեկույցում: ԵԽ կոնգրեսի համազեկուցող Խավիեր Կադորեն ողջունել է այն, որ Ալբանիայում 2015-2020 թվականների ընթացքում առաջընթաց է գրանցվել ապակենտրոնացման և տեղական մակարդակում կառավարման ռազմավարության մշակման հարցում, սակայն կենտրոնական և տեղական իշխանությունների միջև պարտականությունների հստակեցման հարցում լուրջ խնդիրներ դեռ կան:

Մասնավորապես համազեկուցողները կարևորել են, որ կենտրոնական և տեղական իշխանությունների միջև գործառույթների բաշխման հստակեցում պետք է կատարեն անդամ պետությունները, քանի որ տեղական իշխանություններին պատվիրակված լիազորություններն իրականացվում են տարբեր նախարարությունների վերահսկողության ներքո՝ սահմանափակելով տեղական իշխանությունների նախաձեռնության հնարավորությունը: Նաև ափսոսանք են հայտնել, որ տեղական ինքնակառավարման օղակը չի շահել վերջին տարիների տարածքային բարեփոխումներից։

Կոնգրեսն իր հանձնարարականում կառավարություններին հորդորում է  շարունակել ապակենտրոնացման գործընթացը և ավելի համապատասխանեցնել օրենսդրությունը կենտրոնական և տեղական իշխանությունների միջև գործառույթների բաշխման վերաբերյալ: Ազգային իշխանություններին առաջարկվում է վերանայել տեղական ինքնակառավարման մարմինների աշխատավարձերը՝ որակյալ կադրերի հավաքագրման և պահպանման համար ավելի ճկունություն ապահովելու համար: