Ապրիլի 30-ին Եվրոպայի խորհրդի տեղական և տարածքային իշխանությունների կոնգրեսի քարտուղար Անդրեաս Կիֆերն անցկացրեց ԵԽ Կոնգրեսի ազգային պատվիրակությունների քարտուղարների մասնակցությամբ տեսակոնֆերանս: 

Նա ներկայացրեց COVID-19 համաճարակի համատեքստում Կոնգրեսի գործունեությունը և գործողությունները, որոնք բխում են Բյուրոյի որոշումից: Մասնավորապես դրանք կապված են տեղական ինքնակառավարման մարմինների ընտրությունների և մոնիտորինգային առաքելությունների իրականացման վերակազմակերպման հետ:

Ազգային պատվիրակությունների քարտուղարները ներկայացրին այն նախաձեռնությունները, որոնք իրականացվել են ազգային իշխանությունների և տեղական ինքնակառավարման մարմինների կողմից՝ համավարակին դիմակայելու համար: Նրանք հատկապես շեշտեցին առողջապահական համակարգին առնչվող խնդիրները, ինչպես նաև բարձրաձայնեցին ճգնաժամի սոցիալական և տնտեսական ազդեցության մասին:

COVID-19 համավարակի հետ կապված տեղական և տարածքային իշխանությունների կողմից գրանցված փորձառությունն ու գործողությունները կմիավորվեն մեկ միասնական հարթակում, որը հասանելի է Կոնգրեսի կայքէջում:

Տարբեր երկրների տեղական ինքնակառավարման մարմինների փորձը վկայում է այն մասին, որ որքան հնարավոր է շուտ պետք  է վերադառնալ բնականոն գործունեության, որպեսզի պահպանվի ժողովրդավարությունը, մարդու իրավունքներն ու օրենքի գերակայություն: Տեսակոնֆերանսի մասնակիցներն ընդգծեցին ազգային ասոցիացիաների և Կոնգրեսի անդամների դերակատարությունն այս հարցում, որոնք պետք է երկխոսության մեջ լինեն, ինչպես կառավարությունների, այնպես էլ տեղական ինքնակառավարման մարմինների ընտրված ներկայացուցիչների հետ, որպեսզի վստահ լինեն, որ տարվող ազգային քաղաքականությունն արդյունավետ է և որքան հնարավոր է մոտ համայնքների բնակիչներին:

Տեսակոնֆերանսի ընթացքում կարևորվեց նաև փակ սահմանների պայմաններում անդրասահմանային մակարդակում համագործակցության ապահովման մշակման հարցը: