Հուլիսի 24-ին անցկացվեց «Տեղական ինքնակառավարման արդիական ֆինանսական հիմնահարցերը ՀՀ-ում» թեմայով վեբինար:

Այն վարեց Եվրոպայի խորհրդի փորձագետ Արտակ Երգենյանը: Մասնակցեցին տասնյակ համայնքի ղեկավարներ, ավագանու անդամներ, համայնքային ծառայողներ, ՀԿ-ների ներկայացուցիչներ և շահագրգիռ այլ անձինք:

Վեբինարի ընթացքում անդրադարձ կատարվեցին պետական մարմինների լիազորությունների ապակենտրոնացման՝ մասնավորապես ֆինանսական ապակենտրոնացման հետ կապված կարևոր դրույթների: Քննարկվեց ֆիսկալ ապակենտրոնացման և տեղական հարկային վարչարարության համակարգի ձևավորման ու տեղական հարկային ինքնավարության ստեղծման անհրաժեշտության հարցը:

Քննարկումներ ծավալվեցին նաև ֆինանսական և ֆիսկալ ապակենտրոնացման արդյունքում ֆինանսական միջոցների համահարթեցման արդյունավետ մեխանիզմների ապահովման առիթով:

Կարևորվեց բազմամակարդակ կառավարման համակարգի անհրաժեշտությունը:

Վեբինարը կազմակերպեց Հայաստանի համայնքների միությունը Վիշեգրադի միջազգային հիմնադրամի աջակցությամբ իրականացվող  «Համագործակցություն քաղաքների կայուն զարգացման ուղղությամբ. ընդհանուր մարտահրավերներ, ընդհանուր լուծումներ» ծրագրի շրջանակներում:

Ծրագրի գործընկերներն են Լեհաստանի քաղաքների ասոցիացիան, Սլովակիայի քաղաքների միությունը, Հունգարիայի տեղական իշխանությունների ազգային ասոցիացիան, Չեխիայի Ռադլոյի քաղաքապետարանը:

Ծրագրի նպատակն է աջակցել համայնքներին քաղաքական պաշտոնյաների և աշխատակազմերի կարողությունների զարգացման հարցում:

Վեբինարի մասնակիցները նաև հարցեր հղեցին փորձագետին:

Վեբինարները շարունակական են: Հայաստանի համայնքների միությունը կազմակերպվում է նաև «Տեղական ինքնակառավարման արդիական իրավական հիմնահարցերը ՀՀ-ում», «Տեղական ինքնակառավարման Եվրոպական Խարտիան և տեղական ժողովրդավարության վիճակը Հայաստանում», «COVID-19․ Տեղական իշխանությունների համար առկա իրավական շրջանակները և պրակտիկ խնդիրները» թեմաներով վեբինարներ:

Վեբինարների ընթացքում բարձր ակտիվություն և նախաձեռնողականություն դրսևորած ծրագրի կողմից ընտրված մասնակիցները ճանաչողական այցով կմեկնեն Լեհաստան ուսումնասիրելու տեղական փորձը: