Երևանում փետրվարի 18-ին տեղի է ունեցել Հայաստանի համայնքների միության ռազմավարության մշակման աշխատանքային խմբի առաջին հանդիպումը: Հանդիպմանը մասնակցել են ՀՀ տասնյակ համայնքների ղեկավարներ:

Հայաստանի համայնքների միության նախագահ Էմին Երիցյանը նշել է, որ հանդիպման նպատակը Հայաստանում տեղական ինքնակառավարման ոլորտում ու վարչատնտեսական ռեֆորմներին զուգահեռ Միության վերափոխումն է: Նա փաստել է. «Ինչպես գիտեք՝ նախկին 502 համայնքների փոխարեն այսօր ունենք ընդամենը 79 համայնք: Միության կառավարման մարմինները պետք է համապատասխանեցնենք նոր իրողություններին: Մինչ այժմ գործել է Միության կանոնադրական մարմինների եռաստիճան համակարգ: Սակայն այս համակարգն այլևս գործել չի կարող: Որպես աշխատանքային խումբ՝ պետք է փորձագետների աջակցությամբ փոփոխություններ նախատեսենք և ներկայացնենք Միության՝ առաջիկայում հրավիրված համագումարին:

Աշխատանքային խմբի հանդիպման ընթացքում նաև ամփոփվել են Միության գործող ռազմավարական պլանի կատարման աարդյունքները: Քննարկվել են Միության նոր ռազմավարության մշակմանը, ինչպես նաև կանոնադրական մարմինների փոփոխություններին առնչվող խնդիրներ:

Տեղեկացնենք՝ փետրվարի ամսվա վերջում պլանավորվում է անցկացնել Միության հանրապետական խորհրդի նիստ, իսկ  մարտ ամսին նախատեսվում է անցկացնել Միության ընդհանուր ժողով, որի ընթացքում կհաստատվի նոր կանոնադրությունը:

Հանդիպման ընթացքում համայնքների ղեկավարները նաև հնարավորություն ունեցան ՏԻՄ ոլորտի կարգավորումների հետ կապված իրենց հուզող հարցերի պատասխանները ստանալ տեղական և միջազգային փորձագետներից: Հանդիպմանը մասնակցում էին  տեղական փորձագետներ Վահագն  Պետրոսյանը և Արտակ Երգենյան, միջազգային փորձագետներ Դավիթ Մելուան, Ջերեմի Սիմիթը, Իեն Վիլսենը: