Իջևանի համայնքապետարանում օգոստոսի 25-ին «Քաղաքապետերի դաշնագիր՝ Արևելք» ծրագրի կողմից պարգևատրվեցին «ԵՄ Կայուն էներգիայի շաբաթ-2025»-ի շրջանակներում համայնքում անցկացված մրցույթների հաղթողները և կայուն էներգիայի օրերի ակտիվ մասնակիցները։

Պարգևատրման արարողությանը մասնակցեցին ԵՄ Կայուն էներգիայի շաբաթվան մասնակցած բնակավայրերի կրթօջախների ներկայացուցիչները և մրցանակակիր երեխաներն ու երիտասարդները։

Արդեն ավանդական դարձած ԵՄ Կայուն էներգիայի շաբաթն (EU Sustainable Energy Week) այս տարի անցկացվեց հունիսի 10-ից 12-ը՝ «Արդար և մրցունակ կանաչ անցման խթանում» խորագրով:

Իջևան համայնքում Կայուն էներգիայի շաբաթվա շրջանակում իրականացվել է 8 միջոցառում, որին մասնակցել է ավելի քան 1000 մարդ։ Մասնավորապես համայնքում կազմակերպվել է նկարչական մրցույթ, ցուցահանդես, թեմատիկ միջոցառում, էներգախնայող սարքի մակետի պատրաստում՝ թափոններից, կլոր սեղան-քննարկումներ, իրազեկման արշավներ, «Էներգիա բնությունից, հոգատարություն բնությանը» խորագրով արշավ, ծառատունկ և այլն։ «ԵՄ Կայուն էներգիայի շաբաթ-2025»-ին մասնակցել են համայնքի գրեթե բոլոր բնակավայրերը։

Պարգևատրման արարողության ժամանակ համայնքի «Ազատամուտ համայնքի ակումբ» ՀՈԱԿ-ի, Գանձաքարի մշակույթի տան, «Գետահովիտի համայնքային ակումբ» ՀՈԱԿ-ի, «Ավանդույթ» ՀՈԱԿ-ի ներկայացուցիչները պատմեցին, թե կայուն էներգիայի շաբաթվա շրջանակում ինչ միջոցառումներ են կազմակերպել։

«Քաղաքապետերի դաշնագիր՝ Արևելք» ծրագրի Հայաստանի ազգային փորձագետ Արտեմ Խարազյանը, շնորհակալություն հայտնելով Իջևանի համայնքային իշխանությանը, բնակավայրերի կրթական և մարզամշակութային հաստատություններին «Կայուն էներգիայի շաբաթ-2025»-ին ակտիվ մասնակցության  համար, նշեց որ տարեցտարի այս շարժմանը մասնակցող համայնքների թիվն աճում է։ Այս տարի մասնակից համայնքների թիվը 15-ն է, և իրականցված միջոցառումներն անցյալ տարվա համեմատ կրկնապատկվել են՝ հասնելով շուրջ 130-ի։

Ներկայացնելով «Քաղաքապետերի դաշնագիր՝ Արևելք» ծրագրի գործողություններն ու նպատակները, Արտեմ Խարազյանը նշեց․ «Ծրագրի նպատակն է աջակցել, որ Իջևանը և Դաշնագրին անդամակցող մյուս համայնքները մասնակցեն Քաղաքապետերի դաշնագիր նախաձեռնությանը։ Այն համայնքահեն նախաձեռնություն է, որի նպատակն է աջակցել, որպեսզի համայնքները մշակեն և իրականացնեն երկարաժամկետ ծրագրեր կլիմայի փոփոխության մեղմման համար՝ էներգետիկ ռեսուրսների խելամիտ օգտագործում, էներգախնայողություն, վերականգնվող էներգետիկ ռեսուրսների օգտագործում և այլն»։ Իջևանի համայնքապետարանում կազմակերպված պարգևատրման արարողության ժամանակ «ԵՄ Կայուն էներգիայի շաբաթ-2025»-ին ակտիվ մասնակցության և մրցույթներում հաղթելու կապակցության պարգևատրվեցին Լիլիթ Խաչատրյանը, Արթուր Մելիքսեթյանը, Լյովա Իսահակյանը, Վոլոդյա Բեգլարյանը, Գրիգոր Պետրոսյանը, Մարկ Ափինյանը։